euskalkultura.eus

San Salvador, El Salvador. El Salvadorreko hiriburuko euskal etxeko partaideak beha, zain, igurika eta goaitatzen daude, esperoan alegia, datorren larunbata noiz iritsiko San Fermin jaiari ohore salvadoreñoa egiteko. "Urrun gaude Iruñetik, baina gure gogoa, eta gurasoek irakatsi eta pasatu ziguten izpirituak gidaturik enbaxadore onak izango garela uste dugu: euskal etxe gisa lehenengo aldiz ospatuko dugu aurten modu antolatuan San Fermin eta tradizio bilakatu nahi dugu", azaldu dio EuskalKultura.com-i San Salvadorreko euskal elkarteko lehendakari Xabier Mirandonak.

Bazkide. lagun eta zaleei luzatutako gonbidapenak uztailaren 7ko arratsaldeko lau t'erdietan ipini du hitzordua, Santa Teclako El Carmen pasealekuan, taberna eta bar asko dituen gunea, "poteo-txistu" bat izan dadin egunaren abiapuntu. Zer den "poteo-txistua"? Poteoa, txistulari bat bazter girotzaile eta tartean kantuari ere leku eginez, izan ere kantu tradizionalen hitzak ere banatuko baitira. Amaia Larralde izango da ibilbidea girotuko duen txistularia. Ilbideko parte 'txupinazo'aren bertako bertsio bat ere jaurtiko da ta bertaratzeko asmoa dutenei jantzi zuriz eta lepoko gorriz agertzea eskatu zaie.

Ondoren, zazpiak aldean, euskal etxeraino helduko dira ea bertan segituko dute festa, San Fermin giroa, musika, kantuak eta abarrez. Geroago iritsiko da afari konpartitua, menuko parte tortillak, txistorra, gazta, odolkiak eta beste zenbait gutizia, ardoak lagunduta, ahal dela beltz nafarra edo bestela arabar Errioxakoa izan dadin saiatuko direlarik.

Esan azkenik egungo elkarteko Zuzendaritza Batzordea honakoek osatzen dutela:

-Lehendakari: Xabier Mirandona
-Lehendakariorde: Iñaki Mirandona
-Idazkari: Alfonso Tejada
-Diruzain: Marcelino Galdamez
-Batzordekide: Rafael Ramirez
-Batzordekide: Napoleon Vidaurre