euskalkultura.eus

Uztaritze, Lapurdi. Euskal Kultur Erakundeak eta Biarritzeko Atabal gelak mugaz gaineko proiektu deialdi bat abiatu dute gaurko musiken eta irudiaren alorretan, Hogei'ta ekintza labelaren karietara. Ekimen honetan EKEk lagun izan ditu Donostia 2016 – Europako kultura hiriburua Fundazioa, Donostia Kultura, Emankor Sarea (Bilbo), le Rocher de Palmer aretoa (Cenon) eta le Florida gela.  

Deialdiaren helburua da euskal kulturaren (historiaren, gizartearen…) eta euskararen osagai batzu berrinterpretatu eta itxuraldatuko duten egitasmo berritzaileak laguntzea. EKEk agertu duenez, proiektuaren zuzeneko aurkezpenak gaurko musikak eta irudia nahasiko dituen sorkuntza baten itxura ukanen du. Hautagaiek, berek bildu eta grabatu ekaietatik abiatu beharko dute eta material horren baliatzeko eskubidea dutela segurtatu.

Hautagaiak

Deialdian Euskal Herriko zein nazioarteko artistek eta sortzaileek parte har dezakete, Diaspora barne, EKEk Euskalkultura.com-i baieztatu dionez. Dirulaguntza gehienik 13.000 eurokoa (BEZ-a barne) izanen da obra baten ekoizpenarentzat eta aurkezpenarentzat.

Sorkuntza prozesuan artistek egonaldiak egingo dituzte Akitania Eskualdeko eta Euskal Autonomia Erkidegoko gaurko musiken baliabide tokietan. Kasu honetan, bide, aterpetze eta apairu gastuak errezebitzen dituzten egituren gain izanen dira.

Hautagaitzak bidaltzeko epea

Hautagaiek honako dokumentazioa bidali behar dute, apirilaren 30a baino lehen:

• Xede nota bat

• Aurkezturiko proiektuaren aurkezpen zehatza

• Aurrekontu zehatza

• Aintzineko lanen eta proiektuen aurkezpena CV-a

Txostenak emailez (pdf formatuan) eta postaz bidali behar dira bi erakunde hauetara:

• Euskal kultur erakundea - Lota jauregia BP 6 - 64480 Uztaritze

  Frank Suarez - frank.suarez@eke.org

eta

• Atabal – Gaurko Musiken eszena bezala hitzartua - 37 Allée du Moura - 64200 Biarritz
  François Maton - francois.atabal@orange.fr

Informazio gehiago EKEren webgunean, hemen.