Diasporako 30 gazte euskal etxeen kudeaketan ari dira trebatzen, hasi berri den Gaztemundu 2011an

2011/10/27

Gaztemundu programako partaide argentinarrak programara abiatzerakoan

PUBLIZITATEA

Gasteizen dira igandeaz geroztik Gaztemundu 2011 trebakuntza programan parte hartzen ari diren Diasporako gazteak. Guztira 30 gazte dira, sei herrialdetako 26 euskal etxetatik etorritakoak. Euskal Herrian igaroko dituzten bi asteotan euskal etxeak eta kultur elkarteak kudeatzeko trebakuntza ikastaroa jasoko dute eta Donostian egingo den Euskal Gizataldeen 5. Mundu-Batzarrean parte hartuko dute. Gaztemunduk blog bat sortu du, bitarte honetan gazteek, bizi dituzten esperientzien berri eman dezaten eta bertan argitaratuko dira euren kontakizunak, argazkiak eta inpresioak.

Vitoria-Gasteiz, Araba. Astelehenean hasi zen Gasteizen Gaztemundu programaren 2011eko edizioa, eta hiri hau eta Bilbo bisitatzera eskainitako bi egunen ostean, asteazkenean ekin diote gazteek euskal etxeak eta kultur erakundeak kudeatzeko trebakuntza ikastaroari. Partaide bakoitzak bere elkartearen kudeaketa hobetzeko proiektu bat prestatu du Gaztemundurako eta ikastaroan zehar berau gauzatzeko bideak aztertu eta lantzen ari dira.

Larunbat eguerdira arte luzatuko da ikastaroa, goiz eta arratsaldeko saioetan, eta bertan, besteak beste, honako gaiak jorratuko dituzte: euskara euskal etxeetan, giza baliabideak eta baliabide ekonomikoak bildu eta kudeatzeko erak, dokumentuen kudeaketa, euskal kultur transmisioa munduan, 21. mendeko Euskal Herria, kultur ekimenen kudeaketa eta 2.0 komunikazioa.

Igandean taldea Gasteiztik Donostiara aldatuko da eta bertan Euskal Gizataldeen 5. Mundu-Batzarrean parte hartzeko etorriko diren euskal etxeen ordezkariekin bat egingo du. Batzarra Donostiako Kursaal jauregian egingo da azaroaren 2tik 5era bitartean eta gazteek topaketa honetako jardunaldietan eta Euskal Herria Mugaz Gaindi euskal diaspora mintegian ere parte hartzeko aukera izango dute.

1-Gaztemunduko antolakuntzak blog bat sortu berri du, bertan gazteek euren esperientziaren berri eman dezaten. Gaztemundu 2011 bloga, hemen

2-Gaztemundu 2011an parte hartzen ari diren gazteen zerrenda, EuskalKultura.com-en argitaratu genuen artikulu honetan

3-Euskal Gizataldeen V Mundu-Batzarrari buruzko informazio gehiago, webgune honetan eta Facebooken