Danborradaren burrunba Kubara heldu da aurten lehendabizikoz, irlako euskaldunei esker

2011/01/26

Itxura guztietako euskaldunak eta kubatarrak bildu ziren Centro Vasco jatetxean San Sebastian eguna ospatzeko (argazkia JMArrugaeta-EuskalKultura.com)

PUBLIZITATEA

Gipuzkoar festazale sutsu batzuen gogo eta ahaleginari esker ospatu zen joan den urtarrilaren 19an San Sebastian egun bezpera eta egun sartzea Kuban. Irlako AthletiKuba Taldeak ere lagundu zuen antolakuntzan, izan ere, Karibean Errealzale eta Athletikzaleak Euskal Herrian baina zertxobait hobeto moldatzen dira. Bertako euskaldunak eta lagun kubatar batzuk Habanako Centro Vasco jatetxean bildu ziren eta afalostean, sukaldari txano eta guzti, San Sebastian martxa jo zuten Jose Luis Astigarraga, 'Asti'ren zuzendaritzapean. Esan beharra dago Habanakoa munduan egiten diren San Sebastian bezperako afarietan bakarrenetako izango zela angulak zerbitzatzen.

Josemi Arrugaeta/Habana, Kuba. Habanan inoiz ikusi gabeko itxura bitxia hartu zuen joan den urtarrilaren 19an Centro Vasco jatetxean AthletiKuba taldearen topagune izan ohi den aretoak: 25 lagundik gora sukaldari txanoa jantzita, jo eta su San Sebastian martxa egur xaflatan jotzen, Tanborrada euskalkubatar alaian. Irlako hiriburuan bizi diren euskaldun multzo bat eta kubatar lagunak ere gogotik saiatu ziren Habanako danbor nagusia izendatu zuten Jose Luis Astigarraga 'Asti' azpeitiarraren zuzendaritzapean.

Antolatzaileek esandakoaren arabera Kuban horrelakorik egiten den lehen aldia izan zen, eta giro bikaina lortu zen afarian. Jai hau antolatzeko gogoz zebiltzan aspalditik Habanako gipuzkoarrak, eta aurten bai, irlako beste euskaldunen laguntzarekin, antolatu zuten. Afariaren menua Felix Sarasola, 'Felito', sukaldariaren kargu egon zen eta honakoa izan zen: angulak eta arkume errea, ardoa eta egun honetarako bereziki eginiko azkenburukoa, kolore txuri urdineko postrea.

Tamborrada en La Habana 2011 (2)