Cordoba, Argentina. Gerora Euskal Elkarteak urtero antolatzen duen Gutxiengo Hizkuntzen eta Hizkuntza Gutxiengotuen Topaketa bere hamargarren ediziora iritsi da aurten eta euskal cordobatarrek Boliviako, Kataluniako, Esloveniako eta Paraguaiko kolektibitateekin ospatu dute. Urteurren berezi honetan garrantzi hautua eman nahi izan diote antolatzaileek literaturari eta musikari eta karia horretara Topaketari hasiera emateko náhuatl hizkuntzari buruzko bideo bat proiektatu zuten, Joseba Sarrionandiaren "Mintzaira gordelekua denean" testua irakurri bitartean.
Topaketan zehar, euren hizkuntzak aurkezteaz gain, abesti bana kantatu zuen talde bakoitzak, bere jatorrizko hizkuntzan. Gerorako Lu Zabalzak (ahotsa) eta Fernando Zabalza eta Santiago Chamorrok (txistua eta danbolina) ‘Axuri beltza’ taularatu zuten.
Ekitaldia joan den asteko ostiralean, azaroaren 9an, egin zen Cordobako Legislaturako Protokolo Aretoan, eta jende ugari bildu zuen.
Geroraren programari jarraituz, bestalde, joan den igandean, azaroaren 11an, bazkari bat antolatu zuten elkarteko lagunek 2018. urteari itxiera sinbolikoa emateko. Izan ere eskolek abendura arte jarraituko dute baina ahalik eta jende gehiagok parte har zezan, aurreratu egin zuten ospakizuna cordobatarrek.
[Bideoan, aurreskua eta euskarazko, kitxuazko eta katalanezko abestien zatiak]
Lagun bati bidali
Komentarioa gehitu
