euskalkultura.eus

Chivilcoy, Argentina. San Juan Gauaren jaia iragan ekainaren 22an ospatu zuten. Beti Aurrera Euskal Etxeko bazkide eta lagun talde handi batek ibilaldi batekin hasiera eman zion jardunaldiari. Udaletxearen pareko Plaza Nagusitik atera ziren partaideak. Bidean, ohitura jarraituz, dantzariek sorgin maskara jantzi eta giroa alaitu zuten euskal dantza tradizionalak eskainiz. Kamioneta batetik Euskal Herriko musika zabaldu zuten hirian zehar, herritar guztiak festara deituz.

[Ibilaldian parte hartu zuten dantzariek sorgin maskarak jantzi zituzten]

Partaideek Gernika Plazan eta Euskal Etxean amaitu zuten ibilaldia. Elkarteko emakumeek txokolate beroa eta opilak banatu zituzten eta jarraian, dantzariek ikuskizuna eskaini zuten zentroko aretoan 450 lagun ingururen aurrean. Kore Institutuak ere zenbait emanaldi aurkeztu zituen gaueko momentu magikoa iritsi bitartean.

['Beti Aurrera' Euskal Etxeko aretoan ikuskizuna eskaini zuten bertako dantzariek]

Gauean, jardunaldiko partaideek 'San Juango Euskalduna' panpinari su eman zioten. Panpinaren tamaina erraldoia zela eta, hirian zehar aurkeztu aurretik arduradunek garabi bat erabili behar izan zuten jantzia eta gorputzeko zenbait atal ipintzeko. Euskal Etxetik baieztatzen dutenez, jende askok parte hartu zuen ekitaldian, horien artean Chivilcoyko suhiltzaile eta boluntarioak. Festa su artifizialak eta ikusleen txalo zaparradarekin amaitu zen.

['San Juango Euskalduna' panpin erraldoia. Goiko irudian, bere tamaina ikus daiteke pertsona batekin konparatuta]

[Arduradunek panpin erraldoiaren burua garabi batekin ipini behar izan zuten]

[Ikusle ugari hurbildu zen San Juan Gauaren ospakizunera (argazki multzoa Chivilcoyko Euskal Etxea)]

Lotura interesgarriak

Beti Aurrera Euskal Etxea
www.centrovascochivilcoy.blogspot.com