euskalkultura.eus

Chivilcoy, Argentina. Helduak eta gazteak. Euskal etxeko guztiek beren hondar-alea edo harri-koskorra jartzen dute festa gauzatzearren. Gisa tradizionalean partekatzen dute lana eta arratsaldean zehar emakumeak gogor dabiltza lanean janaria prestatzen, gizonak errekia antolatzen eta neska-mutil dantzariak dantzak entseatzen. Horrelakoak izan ohi dira jai egunen prestaketak Chivilcoyko euskal etxean eta horrelakoa izan zen apirilaren 16an, Aberri Eguna ospatzeko.

Gaueko 9ak aldera hasi zen afaria herriko Palemón Huergo kaleko 71. zenbakian dagoen egoitzan eta gonbidatuei ongi-etorria eman ondoren, Aberri Egunak euskaldunentzat daukan esangura azaldu zieten bertaratukoei Beti Aurrera-ko kideek. Jarraitzeko, dantza taldeak pieza batzuk dantzatu zituen, tartean martxoan Cañuelaseko V. Dantzari Topaketan egindako koreografia.

“Oso ondo pasa genuen, oso pozik geuden guztiok, ospakizunak 170 lagun bildu ahal izan baitzituen”, adierazi digute euskal etxeko arduradunek. “Bereziki eskertu nahi genuke gure etxeko emakumeen lana, ezinbestekoa baita ekintzak aurrera eramateko”, azpimarratu dute Beti Aurrera-ko arduradunek.

Datozen egunetan segituko ditugu argitaratzen Argentinan eta munduan zehar hainbat euskal etxetan Aberri Egunaren karietara egindako ekitaldien kronikak, EuskalKultura.com-en lagun-sareak bidalitako informazioak iritsi eta prozesatzen joan ahala.

Argentinako bertako erritmoa ere bai

Bestalde eta Chivilcoyn, gaia aldatuz, aurreko urteetan bezala 2011 honetan ere Beti Aurrera euskal etxeak ateak irekiko dizkie inguruko tango-zaleei. Apirilaren 8an burutu zen 'milonga'n jende anitzek dantzatu zuen tangoaren eta argentinar folklorearen erritmora.

[Urteko lehenengo milonga apirilaren 8an ospatu zen Beti Aurrera Euskal Etxean (argazkia EE)]

Hasteko tango eskolak eman ziren eta ordu txikiak arte geratu ziren dantzariak pausoak praktikatzen. Lehenengo topaketa honetan Gabriel Sosa abeslariaren errezital bat ere bildu zuen ekitaldiak.