euskalkultura.eus

Chascomús, Argentina. Alaitasuna eta poza lagun eta irriek askoren aurpegiak argitzen zituztela egin zen joan den astean, abenduaren 23an, Buenos Aires probintziako Chascomús herrian bertako 'Zingirako Euskaldunak' Euskal Etxeak komunitateari begira antolatutako aurtengo programako azkeneko saioetakoa den hau. Euskal Etxearen 'Eusko Hazia'ko gaztetxo dantzariek euskal dantzen alegrantzia agerrarazi zuten, dantzatuz besteak beste Aurreskua, Arkuak eta Fandangoak, afarian parte hartzen ari ziren guztien txalokada eta sostengu artean.

[Chascomús-eko EEko 'Eusko Hazia' dantza taldeko neska-mutilak fandangotan]

Zaharretxean bizi diren 76 aiton-amonez gain, euren ahaideak, lagunak, Cooperadora-ko kideak, zentruko langileak eta Udaletxeko ofizialak ere agertu ziren ekitaldira, euren artean alkatea bera, Liliana Denot. Dantzen artean, batzuk ikustekoak edota txalokadaz segitzekoak eta beste batzuk, valtsak-eta, partaidetzara bultzatzen zutenak izan ziren.

[Ekitaldian parte hartu zuten 'Eusko Hazia'ko dantzarietako batzuk]

[Parte hartu zuten dantzarietako beste batzuk]

[Alaitasuna eta giro ona nagusi izan ziren ekitaldian. Belaunaldiek lana uztartu eta batak bestearen lekukoa hartzen doaz euskal gaietan zein komunitate ekimenetan]

Chascomuseko Euskal Etxetik beretik EuskalKultura.com-i adierazi zaionez, ekimen honetan parte harturik "Euskal Etxeak geure heldu nagusiak gogoan atxikiz bukatu nahi izan du urtea, baita ere haiek zaintzen lan agiten dutenei euren lana eskertuz".