euskalkultura.eus

Chascomus, Argentina. Zingirako Euskaldunak Euskal Etxea lan interesgarria egiten ari da bere webgunean, elkarteko argazki berri eta historikoak bilduz. Argazkiak (ikus hemen) Zingirako Euskaldunak 2008 Argentinako Euskal Astean izan zuen parte hartzetik hasi eta 1994ean egin zen Urteroko IV. Jairaino heltzen dira, tartean hamaika motatako irudi historiko eta esanguratsuak.

Artxibo historikoen berreskuratze prozesu honen barruan koka daiteke elkarteko idazkari Pedro Maureguik helarazi digun Agirre lehendakariaren bisitaren argazki sorta. Argazkiek ez omen dute data idatzirik eta Maureguik 50. hamarkada bukaera aldera egin zirela uste du. Ziurrenik, Agirrek Argentinara egin zuen hirugarren bisitakoak izango dira, 1955koak.

Aipatu beharra dago Agirre 1941ean heldu zela lehen aldiz Argentinara, erbestera bidean egin zuen bidaia luzearen barruan. Euskal Herritik ihes egin zuen Agirrek Bilbo indar frankistek hartu zutenean, eta Bartzelonatik Parisera joan behar izan zuen. Han, baina, ez ziren arazoak bukatu. Bigarren Mundu Gudarekin hiria nazien agindupean gelditu zen eta Agirrek izen faltsu batekin Europa erdia igaro behar izan zuen Berlinetik Suediara heldu arte eta handik, Ameriketara (istorioa Agirrek berak kontatzen du 'De Gernika a Nueva York pasando por Berlín' liburuan).

Jarraian Pedro Maureguik bidalitako argazki batzuk biltzen ditugu:

[Agirre lehendakaria Chascomuseko euskal komunitateko kideekin, 1955ean Argentinara egin zuen bidaian]

[Chascomuseko euskal komunitateak harrera bazkari bat eskaini zion Jose Antonio Agirre lehendakariari, 1955an hirira egin zuen bisitan. Iruditan, jendartean Raul Alfonsin ageri da (1983tik 1989ra Argentinako presidente izango zena), bere emazte María Lorenza Barrenecherekin]

[Dantza taldeak erakustaldi batekin egin zion harrera Agirre lehendakariari. Iruditan, dantzariak ondo merezitako bazkariaz gozatzen]