Caracasko Eusko Etxeak "1937. Euzkadi bajo las bombas" argazki erakusketa inauguratu zuen

2012/04/03

Bisitariak erakusketako argazkiak ikusten Caracasko Eusko Etxean (argazkia CaracasEE)

PUBLIZITATEA

Caracasko euskal komunitateko kide askok parte hartu zuten iragan martxoaren 31 Eusko Etxean egin zen argazki erakusketaren inaugurazioan. "1937. Euzkadi bajo las bombas" da erakusketaren izenburua eta Durangoko eta Gernikako bonbardaketen argazki historikoak ekarri ditu euskal elkarte venezuelarrera. Inaugurazio ekitaldian lekukotza oso berezia eskaini zituzten bonbardaketetan izan ziren bi emakume euskal venezuelarrek: Maria Teresa Aguirre de Arriagak eta Itziar Rodriguez Seijok. Bonbarketa horien 75. urteurrena betetzen da aurten, eta mundu osoan zehar euskal etxe asko ekitaldi oroigarriak ari dira egiten edo prestatzen.

Caracas, Venezuela. Iragan martxoaren 31ean, Durangoko bonbardaketaren 75. urteurrenean hain zuzen ere, Caracasko Eusko Etxeak “1937. Euzkadi bajo las bombas” izeneko argazki erakusketa inauguratu zuen. Eusko Etxea-ko arduradunek azaldu dutenez, erakusketaren antolakuntzan Durangoko Udalaren eta Gernikako Bakearen Museoaren laguntza izan du elkarteak, argazkiak eta datu historikoak biltzeko, hain zuzen ere.

Erakusketak 1937. urtean gertatu ziren Durangoko eta Gernikako bonbardaketen inguruko 40 bat argazki historiko biltzen ditu. Argazkietan bi herri hauetan gertatu zen txikizioa ikus daiteke, besteak beste. Erakusketa Aberri Eguna arte izango da ikusgai Eusko Etxean.

Durango eta Gernika

Nazioartean oso ezaguna da Gernikako bonbardaketa, zalantzarik ez Picassoren maisulanaren oihartzuna dela eta, baina ezin ahaztu Durango izan zela bonba erasoa jasan zuen lehendabiziko gune zibila. Francoren aliatu ziren indar italiarrek burutu zuten bonbardaketa eta 300 hildako eragin zituzten 1937ko martxoaren 31an.

Ia hilabete beranduago, apirilaren 26ean, Gernika izan zen jomuga. Oraingoan nazien aire-armadako hegazkinek burutu zuten erasoa eta 126 lagun hil zituzten. Bonben eta suteen eraginez, Gernika txikituta gelditu zen eta eraikin gehienak erreta.

Lekukoak Caracasen

Inaugurazio ekitaldian, parte hartze oso berezia izan zuten bonbardaketa hauetan izan ziren bi emakumek: Maria Teresa Aguirre de Arriagak eta Itziar Rodriguez Seijok. Caracaseko euskal komunitateko kide dira eta euren lekukotasunak emozio eta zirrara berezia ekarri zizkion erakusketari. Maria Teresa Durangoko bonbardaketan izan zen eta Itziar Gernikan.

Caracas Expo 1937 (2)

["1937. Euzkadi bajo las bombas" erakusketaren inaugurazio ekitaldian bildu ziren euskal-venezuelar batzuk (argazkia CaracasEE)]

Inaugurazioa ekitaldian Gernikako bonbardaketaren 75. urteurrena dela-eta Eusko Etxeak salgai jarri dituen katilu oroigarriak aurkeztu ziren. Eusko Etxean eskuratu daitezke.

Caracas Expo 1937 (3)