euskalkultura.eus

Buenos Aires, Argentina. Ipar Euskal Herriko kultura Argentinan hedatzeko etengabeko lana egiten dute Norma Rios, Juan Carlos Ibarrola, Mariana Arla, Carlos Bordagaray, Xabi Inzaurgarat, Cristina Cordara eta Carlos Martinez Iparraldeko Euskal Etxeko Kultur Azpibatzordeko kideek. Eurak luzatzen dituzten proposamenek gero eta arrakasta handiagoa dute hiriburuko euskaltzaleen artean. Eta joan den maiatzaren 8an egin zuten ospakizuna ez zen salbuespena izan. Herri Urrats jaia zela eta, mota askotako ekintzak prestatu zituzten antolatzaileek euren gonbidatuentzat.

[Afaldu ondoren, gonbidatuek Herri Urrats-i buruzko bideo bat ikusi zuten (argazkia EE)]

Egoitzako trinketean, Ipar Euskal Herrian bertan egin ziren aurretako jaiei buruzko bideoa bota zen. Bideoan, Estelle Goñi, jaiaren arduraduna ikusi ahal zen. Azpibatzordeko kidea den Carlos Martinezi egokitu zitzaion aurten festaren esanahia, helburuak eta emaitzak zeintzuk diren azaltzea. Bideoa proiektatu eta gero, abesteko momentua heldu zen, baina ez era tradizionalean, karaokearekin baizik. Horrela, euskal abestien musika entzunez eta letrak irakurriz osatutako taldeek lehiaketa batean hartu zuten parte.

[Karaokeaz baliatuta, jendeak abestu egin zuen (argazkia EE)]

Norma Rios-ek izan zuen ondoren Iparraldeko dantzak irakasteko ardura. Gonbidatu guztiek, gazteek eta hain gazte ez zirenek, ongi jarraitu zituzten Normak markatzen zituen erritmo eta pausoak. Bukatzeko, zozketa egin zen lagun bakoitzak oroigarri bat eraman ahal izan zezan.

[Norma Riosen eskutik Iparraldeko dantzak dantzatu ziren (argazkia EE)]