euskalkultura.eus

Buenos Aires, Argentina. 2009tik gauzatzen da Argentinako hiriburuan “Buenos Aires celebra” edo “Buenos Airesek ospatzen du” jaialdia. Festaren helburua herrialde honetara etorri ziren hainbat etorkin eta euren ondorengoak gogoan izatea da eta kari horretara kolektibitateetako ordezkariak dira erakustaldien protagonista eta egile. Gogora dezagun, joan den urteko abuztuaren 28an milaka lagun bildu zirela Mayo Etorbidean “Buenos Airesek Euskal Herria ospagai” festa barru barrutik bizitzeko.

Oraingoan, eta jaialdiaren baitan, proposamen berri bat luzatu die Buenos Aireseko Udalak kolektibitateei. “Gizataldeen Sukaldaritza-Gunean” herri guztiek bat egingo dute hiriburuko biztanleei plater tipikoak eskaintze aldera. Gizatalde bakoitzak bere standaren atzetik defendituko ditu bere produktu, mokadu eta sukaldeko berezitasunak, hauek dastatzera emanez eta gonbidatuekin partekatuz.

Bereziki jan-edate kontuei buruz ari garenean, euskal molde eta ohiturek ezin zuten honelaki ekimen batetik urrun ibili eta bi erakunde-ren eskutik aurkitu ahal izango dira Mayo Etorbidean. Nafar Etxea-ko sukaldariek pintxo hotz eta beroak prestatuko dituzte larunbaterako. Horretaz gain, ganbak baratxuriekin, tortilak, atun pastela eta tripa-zorriak dantzan jartzen dituzten beste zenbait plater eskainiko dituzte. Standa nafar irudi, koadro eta argazkiekin egongo da apainduta.

Buenos Airesko Euskaltzaleak elkarteari dagokionez, euskaltegiak izango du baita proposamen gastronomikoa interesgarria. Bere standean, mota askotako pintxoak ipiniko ditu erosgai, tartean, barazki, piper, urdaiazpiko eta arrain pintxoak. Horrekin batera, informazioa eta oroigarriak eskainiko ditu euskarari buruz, euskal abizenez eta oro har Euskal Herriaz.

Janari erakusketa datorren larunbatean izango da [eguraldiak laguntzen ez badu, igandean egingo da] arratsaldeko 4etatik 11ak arte, Mayo Etorbidean (Bolivar izkina) honako egitarauari jarraituz:

- 16:00: “Sukaldaritza-Gunea”ren inaugurazioa
- 19:40-20:30: Auto zaharren desfilea
- 20:45: Kolektibitateen Buenos Aireseko Erreginaren hautaketa
- 21:00: Erregin gonbidatuen eta hautagaien aurkezpena
- 21:30: Zirku ikuskizuna
- 21:45: Hautagaien bigarren aurkezpena
- 21:15: Tango ikuskizuna eta epaiketaren erabakia
- 22:30: Koroatzea
-22:50: Su artifizialak