euskalkultura.eus

euskal diaspora eta kultura

Albisteak rss

Bruselako Euskal Etxearen Sagardotegi gauak marka guztiak hautsi zituen, ia ehun lagun bildurik

2015/10/26

Txotxik ez eta elkarteko kideek sagardoa nola atera erakutsi behar izan zieten Bruselako lagunei (argazkia Brusela EE)
Txotxik ez eta elkarteko kideek sagardoa nola atera erakutsi behar izan zieten Bruselako lagunei (argazkia Brusela EE)

PUBLIZITATEA

Iragan urriaren 17an Bruselako Euskal Etxeak bere aurreneko Sagardotegi Gaua egin zuen eta elkarteko kide eta lagunen erantzunak aurreikuspen guztiak hautsi zituen. Elkarteak 60 bat lagunentzako lekua prestatu bazuen ere, azkenean ia 100 lagun bildu ziren bertara eta euskal etxeak denak hartu zituen. Bilkuran elkartearen aurkezpena egin zen eta lan molde berriak proposatu ziren.

Brusela, Belgika. Arrakastatsu estrenatu zen Bruselako Euskal Etxea Sagardotegi lanetan eta elkarteak egin zuen aurreneko Sagardotegi Gauak jendetza bildu zuen. "Sagardotegi gaua oso ondo joan zen, espero baino mila aldiz hobeto!!! 90 bat pertsonek eman zuten izena, nahiz eta printzipioz 60rentzat bakarrik izan tokia (eta sagardoa!)", azaldu dio EuskalKultura.com-i elkarteko Ana Etxaburuk. "Azkenean mundu guztia onartu genuen, jende berri asko etorri zen, gazteak batez ere. Eta ez euskaldunak bakarrik".

Menua sagardotegiko janari tipikoa izan zen: bakailau tortila, txuleta, gazta, membriloa eta intxaurrak. Giro ederra izan zen eta afalostean kantuan aritu ziren festara bildu zirenak. 

Lan molde berriak

Sagardotegi gauan bildutako jendetza aprobetatuz, elkarteak bilera informal bat egin zuen. Afalostean euskal etxearen aurkezpen bat zen: ekintzak, eskolak, irakasleak, zuzendaritza batzordeko kideak, eta abar. Elkarteko zuzendaritza kideek lan egiteko molde berriak erabiltzea proposatu zuten.

"Gure lan egiteko modu berriaren oinarrietako bat 'ekintza talde' bat osatzea da. Oraingoz zuzendaritza taldekook hartzen genuen ekintzak antolatzeko ardura. Orain, gure asmoa da jende berria sartzea taldean", azaldu du Ana Etxaburuk. "Jende horrek ez du bakarrik festetan, muntaketan edo afaria egiten lagundu behar. Euren proposamenekin etor daitezke eta guk tokia emango diegu euskal etxean proposamen horiek ekintza bihurtu daitezen. Afari bukaeran izan genituen izen emate batzuk. Aldaketen artean, ni naiz euskal etxeko koordinatzaile berria eta Itsaso Muro izango da 'ekintza taldea'-ren koordinatzailea".

Mundu Batzarrean Gasteizen

Bestalde, Bruselako Euskal Etxeak Mundu Batzarrean izan zuen partehartzearen balioespena egin du. Bertan izan ziren Josu Agirre eta Ana Etxaburu bazkideak. "Gure ustez nahiko ondo joan da, batez ere era informalean izan ditugun kontaktuetan. Bileraren formatoak ez du funtzionatu eta jorratutako gaiak ez zaizkigu beti interesgarriak iruditu. Baina Europako beste euskal etxeekin eginiko lana --Batzarretik at-- erabat  aberasgarria izan da. Oraindik ere lanean jarraitzen dugu gure aldetik proiektu komunak antolatzeko. Pena bat da Batzarrak horrelako lan-espaziorik ez eskeini izana", agertu du Etxaburuk. 

Bruselako Euskal Etxearen Facebook orria, hemen.

Bruselako Euskal Etxearekin harremenetan jartzeko e-mail berria: bruselakoeuskaletxea@gmail.com.


Argazki galeria



Komentarioak

  • Eskerrik asko!

    Eskerrik asko Euskal Kultura artikulu honengatik!!

    Bruselako Euskal Etxea, 2015/10/27 11:22

« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia