euskalkultura.eus

Donostia-San Sebastian. Jaurlaritzako Kultura sailburu Blanca Urgell-ek joan den ostegunean Eusko Legebiltzarrean Leire Corrales legebiltzarkide jeltzaleak egindako galderei erantzutean jakinarazi zituen datuok. Izan ere, esan zuen, Etxepare Institutuaren langileen gaia normalizatzeak pentsatu baino denbora gehiago har dezake eta, beraz, "arrazoitsuena eta zentzuzkoena, Etxeparek bere langile propioak izan arte marka propioko ekimenik ez egitea da".

Ondorioz, litekeena da Jaurlaritzaren Euskal Erkidegotik kanpoko kultur ekintza koordinatzea helburu duen erakundeak aktibitaterik gabe segitzea 2010 honetan, nahiz eta milioi eurotik goragoko aurrekontua onartua duen aurtengorako eta behin-behineko egoitza ere egokitua, eta zegozkion obrak eginda, Donostiako Prim kalean, behin-betirako egoitza Tabakalera eraikinaren baitan izango baitu beste proiektu handi honen obra guztiak bukatutakoan.

Urgellek argitu zuen Etxeparek ekintza propiorik ez izateak ez duela esan nahi behin abiatutakoan bere izango dituen ekintzak geldituta daudenik, "aurten ere egin dugun bezala, Kultura sailetik eta Euskara sailburuordetzatik gauzatuko baititugu".

Euskal Erkidegoko Justizia Auzitegi Gorenak joan den maiatzean onartu zuen LABek Kultura saileko aurreko agintariek egindako Etxepareren lanpostuen deialdiaren kontra jarritako Administrazioarekiko auzi-errekurtsoa eta duela bi aste sozialeko juridikzioaren alde erabaki zuen, beraz "auzia oraindik gehiago luza daiteke".

Sailburuak ziurtatu zuen "inork ez du(ela) guk baino interes gehiago Institutua abiarazteko". Gehitu zuen, atzerapen hau ekarri duen lanpostu deialdiaz, gauzak askoz aurreratuagoak leudekeela baldin eta aurreko legealdian egin izan ez balira hain modu arin eta txapuzeroan".