euskalkultura.eus

euskal diaspora eta kultura

Albisteak rss

Biltzarra eta besta Bakersfield-eko EEan: Louis Iturririak darrai lehendakari eta Teresa Antongiovanni sartu da Zuzendaritzan

2015/03/02

Pozik agertu da Louis Iturriria presidentea (eskumatik, bigarrena) larunbateko bozetan izandako parte hartzearekin. Irudian Zuzendaritza Batzorde berriko eta zaharreko kideak (Argazkia: Kern County Basque Club)
Pozik agertu da Louis Iturriria presidentea (eskumatik, bigarrena) larunbateko bozetan izandako parte hartzearekin. Irudian Zuzendaritza Batzorde berriko eta zaharreko kideak (Argazkia: Kern County Basque Club)

PUBLIZITATEA

Pozik agertu da Louis Iturriria, Euskal Etxeko presidentea, larunbateko hauteskundeen ostean, EuskalKultura.com-ek jakin duenez. 210 kidek hartu zuten parte Zuzendaritza Batzorde berria bozkatzeko orduan; taldeko lau buruek urtebeterako izango dute lana eta, gainontzeko bederatziek, urte birako. Bazkide berriei eta Ohorezko Bazkide berriei ere eman zioten ongi etorria zapatuko bileran, non Denise Duhart eta Denis Petrissans musikari, festa gauerdira arte luzatu zen, ia. "Euskaldun gazteak pozarren zeuden dantzan", adierazi dio EuskalKultura.com-i Pierre Igoa bazkideak, behin elkarretaratzea amaituta.

Bakersfield, AEB. Izen berri bakarra dago Euskal Etxeko Zuzendaritza Batzordeko lau kide nagusien artean: Teresa Antongiovanni. Eta ezaguna da taldean bera ere. Izatez, duela bi urte atera bazen ere Zuzendari Batzordetik (Sean Frank aritu izan da bere ordez), diruzain lanetan ibili izan da urte luzez. “(Sean) Lanpetuegia dago orain eta ezin izan du beste urte batez jarraitu”, azaldu du Iturririak. Berarekin era Antongiovannirekin batera, Joey Iturriria (zuzendari ordea) eta Maria Toretta (idazkaria) dira burukideak.

Zuzendaritza Batzordeko kideen artean beste izen berria Dominique Camou da, Euskal Etxeko Klika taldeko kidea eta haurren esku pilota irakaslea. John Bidart-en tokia hartuko du, honek zortzi urteren ostean boluntario postua uztea erabaki eta gero. “Asko lagundu du Bidartek”, aitortu du presidenteak. “Bera izan zen frontoia konpontzearen ardura zuen taldearen burua eta laguntza eman du baita ere tabernako lan taldean ere. Bera da, bestalde, urtero, poker txapelketaren antolatzailea, eta diru handia jasotzen du Klubak hortik”.

Zuzendaritzako beste kideak honexek dira: Suzy Alexander, Johnny Echeverria, Teresa Echeverria, Raymond Goyeneche, Billy Menta, Sally Nalesnik doktorea., Jenny Recondo eta Pete Urbeltz. Hauekin batera, aurrera egin ez zuten beste bi hautagai aurkeztu ziren: Nick Bordagaray eta Lourdes Iturriria.

Bazkide Gazte eta Ohorezko Bazkide berriak

Ohi denez, hamazortzi urte betetzen dituzten kideak gurasoen bazkidetzatik atera eta beren kabuz bihurtzen dira Euskal Etxeko kide. Hauexek dira kide gazte berriak: Bob eta Andi Beechinor, Rachelle Echeverria, Chelsea Haddad, Alexxa Haddad, Fidel Marcos, Jon-Michel Morris, Krislyn Murphy, Mike Reed, Jeremy Roberts eta George eta Kanae Spriesterbach. Era berean, klubak Ohorezko bazkide izendatzen ditu 75 urte betetzen dituzten eta, gutxienez, 20 urtez bazkide izan direnak. Aurten, hurrengo hauek izan dira Ohorezko Bazkide izendapena lortu dutenak: Albert Ansolabehere, Jay eta Kris Busby, Jean Pierre eta Loli Dalia, Ray eta Sanna Etcheverry, JB eta Virginia Jaureguy, Miguel eta Blanca Lusarreta, Juanito Mendiburu, Lynne Puget eta Yvette Ray.

Epe ertain eta laburrerako planak

Hainbat gai jorratu zituzten bileran, baina hiru izan ziren bereziki aipagarriak. Alde batetik, eta nahiz eta oraingoan Eusko Jaurlaritzak euskara eskolentzako diru laguntzarik eman ez dien, martxotik aurrera Katina Goyheneix izango dute hizkuntza irakasle. Nafarroa Behereko Lekunberrikoa da bera eta Dominique eta Bernadette Minaberrigarai bazkideen lehengusina da. Duela bost urte inguru ere ibili zen euskal etxe honetan eskolak ematen eta, aurten, igandeetan emango dizkie eskolak dantza taldeetako ume eta gazteei eta, aste barruan, CSUB unibertsitateko ikasleei.

Bigarren gai azpimarragarria apirilaren 18an ospatuko duten Diru Bilketa Afaria izango da. Euskal Etxeko dantzari nagusiak Boisera joan nahi dute udan, bertako Jaialdin Bakersfield ordezkatzeko eta, horretarako, dirua behar dute. Afari berezi honetan zozketa bat izango da eta sari nagusia 5.000 dolar dira, beste sari txikiago batzuk ere izango direlarik. Afarirako sarrerak 75 dolarrean erosi ahal dira dagoeneko John Goyenetche (jmgoyenetche@gmail.com) zein Maria Torettari (ttoretta@bak.rr.com) idatzita.

Memoria Bizia proiektuaz ere aritu ziren, euskal diasporako historia mantentzeko egitasmoa da hau, diasporako kideak beraiek protagonista bihurtzen dituena. Steve Bass eta Janet Barreneche buru dituen taldea hurrengo boluntarioek osatzen dute: George Ansolabehere, Larry Errea, Marilou Onandia, Kati Iturriria-Laverty, Dominique Minaberrigarai, and Marguerite Moore-k.

Taldeak egin du lehenbiziko elkarrizketa sakona, George Ansolabehereri berari hain zuzen, zeinen gurasoak Ameriketara ailegatu ziren aurreko mende hasieran. Beste hamabi lagunen zerrenda egin dute elkarrizketekin jarraitzeko eta, Euskal Etxeko lehendakariak adierazi duen legez, “lan handia da hau”, beraz animatu egin nahi du presidenteak jendea, diasporako memoria bizirik mantenduko duen lan honetan parte hartzera, lantaldeak zenbat eta jende gehiago izan hobeto egingo baitu lan, adierazi duenez.



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia