euskalkultura.eus

Coronel Vidal, Argentina. Azken urte hauetako ohitura bati jarraituz, Coronel Vidaleko euskaldunek ikurriña ezarri zuten 'Moxalaren Jai Nazionalean' eta banderarekin batera euskal kultura zabaldu eta ezagutarazteko stand bat altxatu zuten Izatez Harro euskal etxeko kideek, ohi bezala lagun ugariren bisita jasoz.

“Gure standera hurbildu ziren bisitariek Euskal Herriko paisaiak ezagutu ahal izan zituzten proiektatutako bideoetan. Horretaz gain, gure liburutegiko testu batzuk, euskaraz zein gaztelaniaz, jarri genituen ikusgai. Eta euskal abizenei buruzko datuak ere eman genizkien galdetu zigutenei”, azaltzen dute Mar Chiquita partiduko euskal etxeko arduradunek.

60 metro karratuko txokoa, herriko plaza nagusiaren aurrean kokatu zuten Izatez Harro-ko kideek eta haien esanetan “leku aproposena izan zen komunitatearengana heltzeko eta gure erakundeak eskaintzen dituen osasun zerbitzuak hedatzeko. Jende asko hurbildu zitzaigun abizenaz galdetzeko; beste batzuk, euren izena emateko. Beste herri batzuetako euskal etxeetako lagunak ere etorri zitzaizkigun ikurriñak erakarrita”.

Jakina denez, mutualitate gisa sortu zen Izatez Harro eta honekin lotuta dagoen zerbitzu bat eskaini zuten euskal etxeko erantzuleek 'Moxalaren Jaia'ren baitan. “Thema osasun enpresak utzitako bi sistemari esker, odoleko azukre maila neurtu genien eskatu zigutenei. Thema osasun zerbitzuak ez ezik, gurekin dagoen Jonestur turismo enpresarenak ere sustatu genituen jaian”, adierazi dute Coronel Moldeseko euskaldunek.

Euskal standera bertaratu zirenen artean Mar Chiquitako gaur egungo euskaldunen egoerari buruzko aldizkariak banatu ziren, dotoreak eta argazki koloredunak, euskal etxea argitaratzaile.