euskalkultura.eus

Santiago, Txile. Berriketari biletinaren azken aleak irudiz edertuta biltzen du Santiagoko Euskal Abesbatzak eta Euzko Etxeko 'Itxaropen Gaztea' dantza taldeak hiriburuko euskal egoitzan Punta Arenasko Estadio Españoleko koral patagoniarrari abuztuaren 29an eginiko harrera, senidetasun bazkari bat tarteko, koralak banaka zein bateginik kantuz, eta ororen buru elkarrekin batzean bizitutako giro ezinhobe eta gogoangarria buru.

Abuztu eta irailean egin zen, bestalde, urtero --aurten seigarren urtez-- egiten den Euskal Zine Zikloa, Euskadiko Ordezkaritza eta Txileko Unibertsitate Katolikoa antolatzaile, oraingoan Valparaisoko Unibertsitate Katolikoa eta Concepciongo Unibertsitate Katolikoa ere partaide. Erakustaldia abuztuaren 20tik 31era arte eratu zen Santiagon; abuztuaren 29tik irailaren 2ra Valparaison; eta irailaren 7tik 11era arte Concepcionen. Ikusgai ipinitako tituluak, hauexek: Helena Tabernaren 'La Buena Nueva'; Aitor Arregi eta Jose Maria Goenagaren 'Lucio'; Ana Diezen 'Todo está oscuro'; Antxon Ezeizaren 'Días de humo'; eta Kimuakeko laburmetraien selekzio bat.

Doan hartzen den buletina, Berriketari

Data horiekin hein batean bat eginik --abuztuaren 29tik irailaren 6ra arte-- Santiagoko Euzko Etxeak erakusketa ezohiko bat baitaratu zuen, bestetik, bere Ramon de Muguruza Aretoan, Ana Mary Olazaran artista euskal txiletarrak beiraz eginiko lanak erakutsiz, 'Vitrofusion' izenpean. Olazaran gaztetarik Euzko Etxera lotutako pertsona izan da, momentu batean gazte talde inarrosgarria eta aktiboa izan zen 'Itxarkundia' dantza taldeko partaide. Erakusketa honekin etxera itzultzen da. Zorionak berari eta Euzko Etxeri.

Gai horiez gain, Berriketarik Euskal Abesbatzak orain hilabete batzuk Euskal Herrira egin zuen bidaiako berrien atal berri bat eskaintzen du, Arantzazuko Santutegia eta Oñatiko Upaingoa baserria bisitatuz, euskal alkate eta autoritateak edota Juan Zelaia bera harreragile.

Arbide gehiago edo Berriketari buletina zeure postontzian e-mailez errezibitzeko, aski duzu berriketari@gmail.com helbidera idaztea. Santiagoko Euzko Etxe ko webgunea: www.euzkoetxeachile.cl