euskalkultura.eus

Santiago, Txile. Berriketari aldizkari digitalak, Santiagoko Euzko Etxea-ko buletinak, bere hirugarren alea kalean du jada eta bertan jasotzen dira elkarteak azkenaldian egin dituen ekitaldiak, adibidez Iñaki Deunaren jaia eta Canal Vascoren aurkezpena Txilen. Aldizkariko arduradunek, Ignacio Bastarricak eta Maria Angélica Carrascok, editorialean buletinak elkarteko kideen artean izan duen harrera onagatik poza agertzen dute. Aldizkaria jaso eta lagunei bidaltzerakoan, elkarteko kideek Berriketariren 'eragin biderkatzailea' bultzatzen ari dira, eta elkarteko berri gero eta jende gehiagorengana heltzea lortzen ari omen dira.

[María Angélica Carrasco eta Ignacio Bastarrica, Berriketariko arduradunak]

Hari beretik hitzegin zuen elkarteko zuzendari José María Narvarte Arregik Iñaki Deunaren jaian. Narvartek buletinak jendea hurbiltzen egiten duen lana azpimarratu zuen eta 'Euzko Etxea biziten ari den sasoi onagatik' poza agertu zuen. Arlo ekonomikoan 'egoera larriari' buelta eman diote azken urteetan, eta kultur eta gizarte ekitaldiek ere nabarmen egin dute gora euskal elkartean. Preseski, egunotan Euzko Etxean Trinketean I. Euskal Pilota txapelketa egiten ari dira, nazioarteko bederatzi selekzioen partaidetzarekin.

[Euzko Etxean egin zen San Ignazio jaiara bildu zen jendetzaren zati bat]

San Ignazio jaian 'euskal etxea euskal-txiletar belaunaldi desberdinen topagune' izan zen, aldizkariaren esanetan. Eguna meza batekin hasi zen, elkarteko Koruaren  partaidetzarekin, Reverendas Madres Agustinas komentuaren elizan. Ondoren koruak beste emanaldi bat egin zuen Euzko Etxean, Patricio Aburto Jararen gidaritzapean hau ere. Itxaropen Gaztea dantza taldeak, bestalde, erakustaldia eskaini zuen.

[Itxaropen Gaztea taldeko dantzariak]

'Berriketari' e-mailez jasotzeko:

Karin Alvarado Salas
Idazkaritza, Euzko Etxea, Santiago
E-maila:secretaria@euzkoetxeachile.cl
Tel: 222 31 73
Fax: 635 45 55
Vicuña Mackenna 547, Santiago

Lotura interesgarriak

Euzko Etxea, Santiago
www.euzkoetxeachile.cl

Eusko Etxea, Valparaíso
www.euskoetxea.cl