euskalkultura.com

euskal diaspora eta kultura

Albisteak rss

Berlingo Euskal Etxea: 20 urte zubigintzan EHren eta Alemaniaren artean eta larunbat honetan ospatuko du

2018/10/10

Berlingo Euskal Etxeak 20 urte hauetan egindako ekitaldietako bat: Korrikaren saio berlindarra, artxiboko argazki batean
Berlingo Euskal Etxeak 20 urte hauetan egindako ekitaldietako bat: Korrikaren saio berlindarra, artxiboko argazki batean

PUBLIZITATEA

Berlin, Alemania. Hiriburu alemaniarrean egoitza duen "Gernika deutsch-baskischer Kultur Verein e. V." Berlingo Euskal Etxea urtebetetze ospakizunetan dabil, pozez esan baitezake hogei urte bete dituela zubigintza lanean Euskal Herriaren eta Alemaniaren artean. Bazkide eta euskaltzale gehienbat alemaniarren ekimena izan zen hau elkarte aktibo eta ekarpen-emaile segitzen du gaur egun. Sorreratik 12 urtera eskatu zuen onarpena euskal etxe legez eta argi esan daiteke lan fina egin duela bere bi hamarkadako ibilbide honetan. Hori guztia eta gehiago bustiko dute datorren larunbatean lagunartean ospatuko duten afari eta festa txikian.

Karia horretara, balantze labur bat egiten duen gonbidapena zabaldu du Euskal Etxeak, larunbateko ekitaldian parte hartzera deituz. Hona Ainhoa Añorga Osa donostiarra taldeburu duen elkarteak euskaraz bidali digun gonbidapen testua:

20 urte dira hainbat berlindarrek Gernika elkartea sortu zutenetik. Bonbardaketaren 60. urteurrena mugarri eta oroimen historikoa ardatz harturik, Euskal Herria eta Alemaniaren arteko zubiak eraikitzeko asmoarekin ekin zioten lanari.

Ordutik era guztietako ekimen mordoa antolatu dira. Gernikaren suntsiketa eta haren oroimenaren inguruko ekintzez gain musika, dantza, hizkuntza, zinema, historia edota gastronomia jorratu dira besteak beste.

2010etik Gernika Kultur Elkarteak Euskal Etxea izaera onartua du. Aldaketa honek ez du aurretik egindako lana moteldu baizik eta eragin esparruak are gehiago zabaldu. Ordutik, euskal jatorriko berlindarren lana indartu egin da nabari eta horren lekuko ditugu euskera ikastaroak, zinema festibala edota Korrikaren antolaketa arrakastatsuak.

Asko dira hogei urtetan egindako bidelagunak. Makina bat norbanako eta talderekin izan da harremana eta alkarlana. Zerrenda benetan luzea. Horiei guztiei gure esker beroena adierazi nahi dizkiegu gure proiektua aurrera eramateko eman diguten babes eta laguntzagatik.

Euskal Etxeko kideok hogei urte oparo hauek gure bidelagunekin batera ospatu nahi ditugu. Egindakoak gogoratu, ondo pasa eta etorkizunerako indarrak bildu. Horretarako bazkari eder bat antolatu dugu eta bertara etortzera gonbidatzen zaitugu.

-Noiz: Urriak 13, larunbata, 13:30 etan
-Non: The Clash tabernan, Gneisenaustr, 2A, Kreuzberg U-7, U-6 Mehringdamm
-Prezioa: 18€ ko Menua (Bejetarianoa/Haragiduna, edariak barne)
-Izen ematea eta ordainketa: 20jahreeuskaletxeaberlin@gmail.com (azken eguna, urriaren 6a) 



« aurrekoa
hurrengoa »

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.com

jaurlaritza gipuzkoa bizkaia