euskalkultura.eus

Berlin, Alemania. Gernika Kulturverein elkarteak, esan nahi baita Berlingo Euskal Etxeak, dantza ikastaro bat jarri zuen abian urtarrileko azken ostiralean. Baskische Volkstanz Unterricht izenburua du ikastaroak eta Mikel Aristegui koreografo donostiarra dabil bertan koordinatzaile lanetan. Nagore Soroa eta Unai Lauzirika ari dira klaseak ematen.

Ikastaroak harrera oso ona izan du. Unai Lauzirikak EuskalKultura.com-i azaldu dionez "hasierako aurreikuspen guztiak apurtu eta 35 pertsonatik gora bildu ziren lehen klasean. Berlinen bizi diren euskaldunak zein alemaniarrak, denetarik izan zen...". Hasieran ikastaroa hilean bitan emateko asmoa zuten, baina ikasleek hala estatuta, ostiralero egitekotan dira.

 [Lehen eguneko klasearen bideoa: maila oso ona duela erakutsi zuen batek baino gehiagok]

Lehen eguneko klasea Tanzfabrik aretoan egin zen (Mockenbrucke, 68). "Gune oso aproposa da eta jendeak erakutsitako gogoari esker klasea arrakastatsua izan zen oso", diosku Laurizikak. Ikasleek maila aski altua erakutsi zuten eta Kulturvereineko kideek Berlinen ekainean ospatzen den Karneval der Kulturen jaialdian parte hartuko dute, ikastaro honetan ikasitako dantzak jendaurrean erakutsiz.

Euskal etxeko bazkideentzat klaseak debalde dira eta bazkide ez direnek 3 euro ordaindu behar dute klaseko. "Berlinen bizi diren euskaldunak zein euskal kultura zaleak animatzen ditugu parte hartzera", gehitzen du Unaik. "Izena eman nahi duenak Gernika Kultureverein elkarteko facebook orriaren bidez egin dezake, edo korrikaberlin@gmail.com helbidera idatziz, edota 0152 242 95739 telefonora deituz".