euskalkultura.eus

Gral. Rodriguez, Argentina. Hamaikagarren urtez jarraian Buenos Aires probintziako Gral. Rodriguezeko Eusko Aterpea euskal etxeak, bertako komunitate eta inguruko herrietako euskaldunekin ospatu du Aberri Eguna.

Ehunda berrogeita hamar bat lagunentzako erreki edo 'asado' tipikoa izan da bazkariko menua eta euskal etxeko sukaldariek berek prestatu dute baita ere amaieran zozkatutako txerria.

[Eusko Aterpea euskal etxeak antolatutako Aberri Eguneko ospakizunera hurbildu ziren lagunetako batzuk (argazkia EE)]

Jaia Argentinako bandera eta ikurrinari egindako ongietorriarekin hasi zen. Ondoren erakundearen lehendakaria den Raul Tarettok hitz batzuk zuzendu zizkion bildutako jendeari. “Urtero ospakizun honetan azpimarratzen dugun bezala gaur ere esan nahi dugu Euskal Herriaren etorkizuna euskaldunen esku egon behar dela”, adierazi zuen Tarettok.

[Euskal etxeko dantza taldeak bere koreografiekin alaitu zuen jaia (argazkia EE)]

Bukatzeko, Itziar Mohr irakaslearen eskutik, euskal etxeko dantzari eta gonbidatu guztiek Euskal Herriko dantza tipikoenak dantzatu zituzten, arratsaldeko 5ak arte luzatu zen elkarretaratzean.

[Gonbidatuen artean zozkatu zen txerri errea (argazkia EE)]

Egoitzaren eraikuntza-lanak

Ahalegin handiak egiten ari dira Gral. Rodriguezeko euskaldunak beren etxearen egoitza bukatu ahal izateko; eta ahalegin horien emaitzak bistan daude honez gero. Aberri Eguneko jaiarekin batera, eraikuntza-lanak aurrera doazela ere ospatu dute rodrigueztarrek. Balio anitzeko aretoko zorua --hemen SUM, sala de usos multiples,  deitzen dena-- prest eta erabiltzeko moduan dago pasa den maiatzaren 8tik. Datozen hilabeteetan, berriz, sabaia bukatzeko falta diren 120 metro koadro egingo direla aurreratu dio EuskalKultura.com-i Eusko Aterpea-ko lehendakari Raul Tarettok.