euskalkultura.eus

Azul, Argentina. Abenduaren 16a da Buenos Aires probintziako Azul hiriaren sorrera-urtemuga eta, aurten ere Udala antolatzaile, mota askotako ekinzak programatu ziren egun horretan hiri mailako data esanguratsua ospatzeko. Ekitaldia joan den igande goizean hasi zen Pedro Burgos fundatzailearen omenezko zeremoniarekin eta esker emate mezaren ostean kabalkada eta musika eta dantza ikuskizunak egin ziren Urioste etorbidean. Hiriko beste hainbat erakunderekin batera, Azulgo Gure Txokoa Euskal Etxea ere ospakizunetako parte izan zen, euskal gizataldearen ordezkari

Agintarien aurrean pasa zen desfilean, Euskal Etxeak honako ordezkaritza izan zuen: banderaduna Sara Aristu izan zen; estandartea eraman zuena, Maria Ines Etchevers Aizpiri; eta laguntzailea Graciana García.

Urte amaierari begira beste bi berri iragarri dituzte azuldarrek. Alde batetik, Euskal Etxearen lehenengo sorreraren 25. urteurrena ospatuko dute abenduaren 28an. Bestetik euskal ikasleek jakinarazi dute 2018ko patxaran uzta prest daukatela. 'Gure Patxarana' dastatu nahi duenak Euskal Etxetik pasatzea besterik ez dauka.