euskalkultura.eus

Azul, Argentina. Azulgo euskaldunen egoitza berria Yrigoyen kaleko 926. zenbakian dago eta elkarteko kideak oso pozik agertzen dira aldaketarekin. “Etxe hau bestea baino erosogoa da; gainera oso ondo kokatuta dago”, azaldu diote zuzendaritza batzordetik EuskalKultura.com-i.

Ekintzak ere dagoeneko hasiak dira Gure Txokoan. Abesbatza ostiraletan elkartzen da gaueko 8etatik 10etara; dantza klaseei dagokienez, txikiek astearteetan eta ostegunetan iluntzeko 6etatik 7:30etara entseatzen dute; helduek, berriz, ostegunetan 8etatik 9:30etara. Euskara ikasteko ere bi talde daude. Bigarren urratseko ikasleak asteazkenetan eta ostiraletan iluntzeko 6etatik 7:30etara joaten dira eskoletara eta hasi berriak, aurten hasi direnak, 7:30etatik 9etara.

Aberri Eguneko bazkaria

Bestalde, joan den apirilaren 9an eta Aberri Eguna oroitzeko, Azulgo euskaldunek meza berezi bat eskaini zuten. Meza horretan herriko euskaldunak eta joan diren euskal etxeko kideak gogoan izan zituzten. Euskal Herrian eta Diasporan garrantzi handia duen Aberri Egunaren ospakizunekin jarraituz, igande honetan bazkaria prestatuko dute Yrigoyen kaleko etxe berrian, eta arratsaldean jolasak egingo dituzte bertako aretoan.

Datorren hilean, berriz, San Martin zine-areto ohian, ‘Euskadi Hoy’ argazki erakusketa eskainiko zaio komunitate osoari. Informazio gehiago eskuratzeko, telefono zenbaki berria 02281-435489 da.