euskalkultura.eus

San Miguel, Argentina. 'San Miguelen abizen euskaldun asko daude, eta orain arte ez zegoen jendearenganaino hel zitekeen inongo proposamenik ezta Euskal Herriaren berri eman zezakeen erakunderik ere', azaldu diote EuskalKultura.com-i talde berriaren sortzaile diren Mariana Fernández Castellik, María Jesús Andrés Zarandonak, Elba Reggik, Néstor Fernándezek, Itziar Mohrrek, César Mohrrek, Nerea Mohrrek eta Horacio Marotto Etxezaharrek. 'Horregatik, ezinbestekoa iruditu zaigu hutsune hori betetzea. Guztiok daramatzagu urte batzuk Euskal Herriko kulturan murgilduta eta, garrantzitsuena, lan egiteko gogo handia dugu. Hori dela eta elkartu gara eta erabaki dugu gauzak egiten hastea'.

Eta laster ekingo diote euren lehenengo jendaurreko ekitaldiari; datorren uztailaren 11an hain zuzen. Larunbat horretan, Koldo Zabalondo arotz euskaldunak ‘Haritza Euskal Herriko Historian’ izeneko mintzaldia emango du San Miguelgo Merkataritza eta Industria Ganberan. Hitzordua, arratsaldeko 5ean izango da, Sarmiento kaleko 1663. zenbakian.

Zabalondok eskainiko duen hitzaldia jaio berria den taldearen lehenbiziko ekintza izango da eta arduradunek esaten dutenez, 'zerrenda luze bateko lehenengoa izatea espero dugu'. Gainera, taldeak ikur hartu duen irudiarekin zerikusi handia du lehenengo topaketa honek. 'Haritzaren adarra hautatu dugu ikur, ez elementu horrek daukan esanahiagatik bakarrik. Haritzaren fruitua ere hartu dugu eta fruituaren hazia, gu geu hazia garelako: asko garatuko den eta etorkizunera, askatasunez, garatuko den hazi bat', adierazi dute.