euskalkultura.eus

Resistencia, Argentina. Giro zinez onean eta asko ikasi izanaren sentimentua nagusi bukatu da Resistencia, Chaco probintziako hiriburuan bertako 'Kotoiaren Lurra' Euskal Etxeko 'Aurrera Goaz' antzerki taldeko kideek antolatutako antzezpen teknikak hobetzeko tailerra. Kurtsoak hiru egun iraun ditu eta bakoitzean hiru orduko hiru klase praktiko egin dira. Tailerra emateko, propio etorri dira Villa Mercedesetik Luis Palacio eta Verónica Castillo taula gaineko profesional ezagunak. Ekimenak lortutako oihartzunaren seinale, ikastaroak Don Bosco eskolara bildu dituen 30 partaideak.

[Tailerraren antolatzaileak Mariela Echavarría, Mauro Ariel Carruego eta Rocio Villoldo]

[Talde lana lantzea funtsezkoa da oholtza gaineko arte honetan]

Ekimenak iraun dituen hiru egunetan, ikasleek bereziki inprobisazioa lantzen eta bapateko antzezpen laburrak sortzen ikasi dute. Aldi berean, aurrez idatzitako gidoiak ondo antzezteko teknikak jorratu dituzte Luis Palacioren laguntzarekin. Ikastaroak oro har aktoreen sormena garatzea izan du helburuetako bat eta Palacioren eskolek, antzezpen teknika berriak izateko tresnak eta baliabide eszenikoak eman dizkie bertara bildutako lagunei. Halaber parte hartzaileek aktorearen eta antzerkien dinamika profesionala bertatik ezagutzeko aukera izan dute. Horretan guztian aritu eta saiatu ostean, azkeneko egunean, Euskal Etxeko lehendakari Marta Susana Ciruelo Etxeparek ziurtagiri bana eman die partaideei.

[Diploma banaketa: Rocio Villoldo, EEko lehendakari Marta Susana Ciruelo Etxepare de Canteros, Mariela Echavarría eta Mauro Ariel Carruego]

[Tailerrean parte hartutako bost gazte euren ziurtagiriekin]

'Aurrera Goaz' taldekoek eskerrak eman nahi izan dizkiete Luis Palacio eta Veronica Castillori ikastaroa emateko prest azaltzeagatik eta bertan ikasi ahal izan duten guztiagatik. Antzerki taldearen esker bereziak baita ere Euskal Etxeari, etengabe ematen dieten laguntza eta sostenguagatik. Baita ekimena islatu duten hedabideei ere, Chaco Probintziako Kultura Institutuari eta, bistan da, ikastaroan parte hartutako guztiei.