euskalkultura.eus

Necochea, Argentina. Ohiko mezarekin hasi zen Euskal Asteko azken eguna. Elizkizuna bukatuta eta programari jarraituz, lore sorta bat utzi zuten euskaldunek Dardo Rocha enparantzako Gernikako kimuan. Eguraldia lagun eta Eskola Danimarkar-era abiatu aurretik --bertako kiroldegian egin zen otiruntza--, danborrada eta dantzak gauzatu ziren eliz aurrean.

Bazkarian Euskadiko eta Argentinako hainbat euskal erakundetako agintariak poz-pozik agertu ziren jaiaren giroarekin. Gonbidatuen artean, Josu Legarreta Bilbao, 1986tik 2009ra Eusko Jaurlaritzaren Euskal Gizataldeen Zuzendari izan zena egon zen.

Bazkarian zehar, euskal etxe anfitrioiak opariak eskuratu zizkien Euskal Herritik etorritako artistei eta euskal etxeak eta FEVAk lehiaketetako sariak banatu zituzten irabazleen artean. Hona argazki kronikaren azken zatia:

[Eliza lekuko, mutilek ikurrinak astindu zituzten (argazkia EuskalKultura.com)]

[Txikiak ere euskal asteko protagonista. Euren eskutik, Ipurdi dantza (argazkia EuskalKultura.com)]

[Agintariez inguratuta Felipe Muguerzak agurtu zuen bildutako jendea. Mahai nagusian, besteak beste, Julian Celaya, Felipe Muguerza, Ricardo Basterra eta Elvira Kortajarena (argazkia EuskalKultura.com)]

[Necocheako Euzko Etxea euskal etxeak oroigarriak eskuratu zizkien Euskal Herritik etorritako lagunei. Irudian, Jose Maria Abad-ek jasotzen du euskal etxeko zapia (argazkia EuskalKultura.com)]

 [Jaio berria den Puerto Madryngo euskal etxeko kideentzat jai berezia izan zen hau. Maria Julia Ercorecaren omenean egindako festan, Etorritakoengatik-eko dantzariek tristura gainditu zuten eta euren pauso onenak erakutsi zituzten plazan. Bazkarian, berriz, oparia eman zioten euren euskal etxe babeslea denari, Necocheako Euzko Etxeari. Argazkian Felipe Muguerza plaka hori erakusten (argazkia EuskalKultura.com)]

[Publiko argentinarraren txalo, mirespen eta maitasuna bereganatu zuten Aukeran Dantza Konpainia-ko gazteek (argazkia EuskalKultura.com)]

[Euskal Herriko erromerietako giroa sortu zuen Drindots Taldeak Necochean. Errepertorio tradizionala eta rocka batu ziren aparteko bi kontzertuetan (argazkia EuskalKultura.com)]

[Euskal Asteko kartel lehiaketaren irabazlea Santiago Agustin Mari Felizia izan zen. Agustinen amak (eskuinean) jaso zuen saria (argazkia EuskalKultura.com)]

[Gazte andanak hartu zuen parte hondartzako herri kiroletan, baina talde bakar batek lortu zuen lehenengo saria (argazkia EuskalKultura.com)]

[Euskara bultzatzeko lehiaketako sariak ere banatu ziren igandean. “Barnealtxor” ezizenarekin, Eusko Kultur Etxea-ko Maria Echevarne, Guadalupe Garcia, Celeste Girasole eta Rosa Misciagna geratu ziren taldeko lehenengo sariarekin. (argazkia EuskalKultura.com)]

[Irakasleen kategorian eta talde lanari dagokionez, Montevideoko Haize Hegoa euskal etxeko Nidia Abaddiek irabazi zuen, “Nene” izengoitiarekin (argazkia EuskalKultura.com)]

[Eta kategoria berean baina banakako lanari dagokionez, Montevideoko Haize Hegoa euskal etxeko Andrea Bellak irabazi zuen, “Mikatxu” izengoitiarekin. Argazkian, Andrea, Mika bere alabatxoa, Teresa de Zavaleta eta Carlos  Bilbao (argazkia EuskalKultura.com)]

[Umeek egindako postalek ere jaso zituzten sariak. Lehenengoa Necocheako Ikastolako 7. eta 8. urte arteko ikasleentzat izan zen. Gaia: herri kirolak. Bigarren saria, Ikastolako 6. eta 7. urte artekoentzat. Gaia: Euskal Baserria. Anjela Zubiri Ikastolako irakasleak hartu zituen sariak (argazkia EuskalKultura.com)]

[2012ko euskara klaseak zabaltzeko afixa irabazlea Pablo Cufre Rio Cuartoko irakasleak egindakoa izan zen (argazkia EuskalKultura.com)]

[2011ko Euskal Astea igande bazkalostean bukatu zen. Bazkaldu eta gero, eta agurraren tristurarekin, hustuz joan zen aretoa. Hala ere, alde egin aurretik Fandango batzuk dantzatzeko denbora izan zuten dantzariek (argazkia EuskalKultura.com)]