euskalkultura.eus

Donostia-San Sebastian. Bi urte daramatza "80 egunean" filmeak nazioarteko jaialdietan parte hartzen eta makina bat sari eskuratzen (100 jaialdi eta 30 sari, ezta marka makala). Emeki emeki eta harrabotsik sortu gabe, munduan zehar zaleak liluratu egin ditu bi emakumen helduen arteko maitasun istorioa kontatzen duen filme intimista eta eder honek.

Aste honetan azken berri ona -momentuz- eman du filmak: Frantziako 25 zinema aretotan estreinatu da, euskarazko jatorrizko bertsioan eta frantses azpitituluekin. Euskal filmeek eta, orohar, luzemetraia independenteek inoiz gutxitan lortzen duten balentria da, eta Jon Garaño eta Jose Mari Goenaga zuzendariak pozik ageri dira.

"Benetan zaila da Frantzian estreinatzea, merkatu handia eta lehia handikoa delako", esan dio Jon Garañok EuskalKultura.com-i. "Gainera azpimarratzekoa da estreinaldia kondizio oso onean egin dela: 25 kopiarekin atera da filmea. Euskal Herrian, adibidez, 14 kopiarekin estreinatu genuen eta Espainian 16 kopiakin", agertu du. Parisen sei zinematan dago ikusgai.

Frantzian euskaraz estreinatzen den lehen filmea da "80 egunean" eta zinema aretoetatik igaro ondoren DVD formatoan plazaratuko du Epicentre banatzaileak. Frantziar estreinaldi honetaz gain, aurretik Norvegiako eta Poloniako zinema aretoetan ere izan da ikusgai filma eta aurki Suediako aretoetan estreinatzekotan da. Zorionak lantaldeari!

-Filmea Donibane Lohizuneko Sélect aretoan eta Biarritzeko Royal zineman dago ikusgai eta uztailaren 4tik aurrera Baionako l'Atalante-n emango dute. Frantziako hiri nagusietako emanaldiak, hemen.