euskalkultura.eus

euskal diaspora eta kultura

Albisteak rss

70 lagun partaide egin da La Platako Unibertsitatean (UNLP) euskal kooperatibismoari buruzko mintegia

2009/06/08

Javier Clúa, La Plata Euzko Etxeko lehendakaria; Judith Martirena, UNLPko Gogoetarako Euskal Katedrako zuzendaria; JM Larrañaga irakaslea; Veronica Montes UNLPko Zientzia Ekonomiko Fakultateko IECeko zuzendaria; eta Mariluz Artetxe, EIko lehendakariordea
Javier Clúa, La Plata Euzko Etxeko lehendakaria; Judith Martirena, UNLPko Gogoetarako Euskal Katedrako zuzendaria; JM Larrañaga irakaslea; Veronica Montes UNLPko Zientzia Ekonomiko Fakultateko IECeko zuzendaria; eta Mariluz Artetxe, EIko lehendakariordea

PUBLIZITATEA

Arrakastaz egin berria da maiatzaren 26tik 29ra Buenos Aires probintzia argentinarreko hiriburuan 'Euskal kooperatibismoa: baloreak eta internalizazioa' izeneko graduondoko mintegia, Eusko Ikaskuntzak eta Universidad Nacional de La Platak (UNLP) indarrean daukaten lankidetza akordioaren baitan. Jose Maria Larrañaga ingeniari teknikoa izan da irakasle. Ekimenak lortu duen oihartzunaren seinale, bildu dituen 70 partaideak, La Plata ingurutik ezezik, Buenos Aires probintzian urrun dauden San Miguel del Monte, Necochea eta Bahía Blanca hirietatik ere hurbilduak.

La Plata, Argentina. Lau saio-egun izan dituzte UNLPko Gogoetarako Euskal Katedra Askeak eta Zientzia Ekonomiko Fakultateko Ikasketa Kooperatibo Institutuak elkarrekin gauzatutako jardunaldiok. Graduondoko mintegia Euskal Herritik propio etorritako Jose Maria Larrañagak eman du, Eusko Ikaskuntza eta La Platako Unibertsitako akordioaren testuinguruan. Ikastaroaren funtsezko gaia euskal kooperatiben mugimendua izan da, batez ere bere alderdi sozial eta juridikoa, eta hezkuntza-alderdiari ere erreparatuz.

la plata 2009 mintegia kooperatibismoaz

[Jose Mari Larrañaga irakaslea --paretean proiektatutako irudiaren azpian--, mintegian parte hartutako ikasle talde batekin]

Kurtsoko egitarauari dagokionez, Arizmendiarrieta, bere baloreak eta pentsaera izan zen lehenengo eguneko ikasgaia. Bigarren egunean kooperatibismoaren historia eta mugimenduaren sorrera aztertu ziren; hirugarrenean, kooperatibismoaren errealitateaz mintzatu zen Larrañaga; azken egunean, berriz, 'Internalizazioa eta Mondragon mende berri batean' delako unitatea garatu zen. Larrañagaren hitzek zenbait bideo eta irudi izan zituzten lagun.

Izan ere, Jose Maria Larrañaga irakasle aditua eta esperientzia handiko ingeniaria da Mondragon Korporazio Kooperatiboan. Enpresa kooperatibo zuzendaritzan masterra du eta irakasle gonbidatu aritu da hainbat unibertsitatetan, hala nola Salamancakoan, Euskal Herrikoan (EHU), Deustuko Unibertsitatean, Kolonbiako Unibertsitate Javierana-n, Kolonbiako Minuto de Dios Unibertsitatean Bogotan, eta Zaragozako Unibertsitatean.

Lotura interesgarriak

Mondragon Korporazio Kooperatiboa
www.mcc.es

La Platako Unibertsitatea
www.unlp.edu.ar

 

 

 

 

 

 

 



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia