euskalkultura.eus

Chacabuco, Argentina. “Ez da batere arrunta euskal etxeak bezalako erakundeetan biltzarrak hain jendetsuak izatea”, komentatzen zuten Chacabucoko hedabideek urriaren 1ean 'Guillermo Larregui' Euskal Etxeko batzorde berria aukeratzeko bileraren berri jasotzerakoan. Izan ere, 70 bat kidek hartu zuten parte hauteskundeetan, zerrenda ofizialari 53 eta aurkakoari 14 boto emanez.

“Ohiko Batzar Orokorra burutu baino egun batzuk lehenago, Eduardo Izurieta lehendakari zuen aurreko batzordeak egindako kudeaketarekin ados ez zeuden lagun batzuek zerrenda berria osatu zuten eta hauteskundetara aurkeztea erabaki”, azaltzen zuen vivechacabuco.com web orriak. “Hori dela eta inoiz baino jende gehiago bertaratu zen bilerara”.

Biltzarrean, aurreko urteko txostena eta balantzeak onartu zituzten. Segidan, euskal erakundeko kargu nagusienak erabaki ziren, hala nola lehendakari, idazkari, eta zuzendaritza batzordekideak eta kontu-hartzaileak. Botoen zenbaketa egin ondoren, emaitzek garaipena eman zioten Elvira Guruceaga zerrenda ofizialistaren hautagaiari. Jorge Zabaleta, zerrenda alternatiboaren ordezkaria 14 botorekin urrun geratu zen etxeko lehendakaritzatik.

'Guillermo Larregui' Euskal Etxearen 2010-2012 eperako Zuzendaritza Batzorde berria, beraz, honela geratu da:

-Lehendakaria: Elvira Mariana Guruceaga
-Lehendakariordea: Juan Carlos Zubeldía
-Idazkaria: Mariela Esther Iriart
-Idazkari ordea: María José Tillet

-Diruzaina: Sonia Beatriz Armendáriz
-Diruzain ordea: Eliana Domench

-Batzordekide titularrak: Miriam Lopetegui, Analía Etcheverry
-Batzordekide ordezkoak: Emiliano Echave, Eduardo José Izurieta

-Batzorde Kontu-hartzailean: Adelma Eguinoa, Eliana Dubarry, Pablo Pavesa
-Batzorde Kontu-hartzaileko kide ordezkoak: Yesica Garmendia, Jorge Eliceyre