euskalkultura.com

euskal diaspora eta kultura

Albisteak rss

28 edizio bete ditu aurten Sarako Idazleen Biltzarrak, Iparraldeko irakurle eta idazleen bilgune

2011/04/27

Sarako Idazleen Biltzarrean, EuskalKultura.com-eko standean, Joseba Etxarri gure zuzendaria Mirentxu irakurle gaztearekin eleka. Konexio familiarrak dauzka Mirentxuk AEBetako Idaho eta Kalifornian (argazkia Inazio Mujika Iraola)
Sarako Idazleen Biltzarrean, EuskalKultura.com-eko standean, Joseba Etxarri gure zuzendaria Mirentxu irakurle gaztearekin eleka. Konexio familiarrak dauzka Mirentxuk AEBetako Idaho eta Kalifornian (argazkia Inazio Mujika Iraola)

PUBLIZITATEA

Jakina denez, idazle frangoren presentzia eta ematen duen aukera, publikoak zuzenean egileekin mintzatu eta iritziak, iradokizunak eta kritikak truka ditzan dira joan den astelehenean bere 28. edizioa bete duen Sarako Idazleen Biltzarreko ezaugarri nagusi. On Joxe Miel Barandiaranek Sarari buruz gaztelaniaz idatzi eta orain euskarara eta frantsesera ekarritako 'Bosquejo etnográfico de Sara' izan zen bertan aurkeztutako liburuetako bat. Erakusketa bat ere zabaldu zen, Fermin Arkotxaren eskutik, Agosti Xaho euskal aitzindari handiaren bigarren mendeurrena kari. EuskalKultura.com-ek, ohi bezala, bere standa izan zuen.

Sara, Lapurdi. Egun bizia izan zen astelehenekoa. Eguraldia ez zen gaizki portatu eta jendea nonbrean sartu zen Sarako kiroldegira, esan nahi baita Sarako Idazleen Biltzarra urtero egiten den aretora. Durangoko 'anaia nagusiak' ere bertaratu ziren, Gerediagako arduradunak alegia, eta aurkezpen programa zalu joan zen. Antolatzaileek eman xifretan, orotara eta euskaraz zein frantsesez eta bestelako lengoaietan 282 izan ziren iragan urtetik hona azokaratutako liburu eta emaitza berriak.

Xiberoko euskara maite dutenek, eta Diasporari lotua, bertan erdietsi ahal izan zuten Bob Laxalt-en 'Sweet Promised Land' eleberria, lehenengo aldiz Dominique Laxalt zenaren jatorrizko euskalkira ekarria, pena hala ere, frantsesa tarteko egin izana, Sü Hazia elkarteak joan den abenduan argitara emana, orduan lerro hauetan aipatu genuen bezala. Xibererara hurbiltzeko baita ere, Jüje Etchebarneren 'Gramatika emendakinak', berez ikasmateriala, gau-eskoletan irakasle eta ikasle direnen erabilgarri.

Sartu eta berehala, egurrean landutako bi figura afrikarren erdian, Xipri Arbelbide ikus zitekeen, 'Sorginak. Lehen eta orain. Afrikan eta hemen' liburuarekin. Franck Dolosor kazetari senperetarrak, bere herriko Matxin Irabola bertsulariari buruzko liburuarekin zegoen azokan, eta Agustin Errotabehere, 'Jean Pitrau, La révolte des montagnards'ekin, bizia Euskal Herria eta Biarno artean eman zuen sindikalistaz. Pamiela argitaletxe nafarra, berriz, Joseba Sarrionaindiaren 'Moroak gara behelaino artean?' izenburuarekin azaldu zen azokan.

EuskalKultura.com-en standak, ohi bezala, Diasporarekin zerikusia daukaten materialak azaldu zituen, tartean mundu osoko euskal etxe eta komunitateei buruzko irudi-sorta bat ordenagailuan etengabe ikusgarri. Honelako hitzordu batean, eta Iparralde honetan familia guztietan Ameriketan ibilitako inor badelarik, Hego Ameriketan Argentina, Uruguai, Venezuela eta Txilekin harremanak dauzkaten bisitariak pasatu ziren eta, Ipar Ameriketan, Estatu Batuetako (Kalifornia, Nevada, Idaho, Virginia... bai Virginia), Quebec eta Mexikon dauzkatenak.



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.com

jaurlaritza gipuzkoa bizkaia