euskalkultura.eus

euskal diaspora eta kultura

Albisteak rss

20. urtemugaren urtean Zingirako Euskaldunak EEak bere jai nagusia ospatu zuen uztailaren 9an

2011/07/20

Chascomuseko Zingirako Euskaldunak euskal etxeko egoitza (argazkiaEE)
Chascomuseko Zingirako Euskaldunak euskal etxeko egoitza (argazkiaEE)

PUBLIZITATEA

Urte osoko ekitaldi-egitaraua eratu dute Chascomuseko euskaldunek euren euskal etxearen 20. urtebetetzea ospatzeko. Azken hilabeteotan, gaztetxoei zuzendutako udalekua eta komunitate osoari begirako hitzaldiak gauzatu dituzte Buenos Aires probintziako hiri honetako euskal etxea antolatzaile. Ospakizun ekitaldiekin jarraitzeko, uztailaren 9an urteurren afari nagusia egin zuten herriko Fortin-ean. Euskal-argentinar komunitateko hainbat ordezkari lagun izan zuten chascomustarrek garrantzi handiko zeremonia horretan, tartean FEVAko lehendakariorde Arantxa Anitua; Cañuelaseko zuzendaritza batzordekide eta dantzariak; eta La Platako Euzko Etxea, Mar del Platako Denak Bat, Necocheako Euzko Etxea, Suipachako Gure Txokoa, Buenos Aireseko Laurak Bat eta Iparraldeko Euskal Etxea-ko ordezkariak.

Chascomus, Argentina. “Euskal Herriko kultura mantendu eta zabaltzeko helburua duen erakunde honen 20. urtemuga ospatzen ari gara, datozen urteetan biderik onenari eusten jarraitzeko asmoarekin”. Izpiritu honekin ospatu zuten Chascomuseko euskaldunek beren euskal etxearen urtebetetzea. Uztailaren 9an gauzatutako afaria, Argentinako Independentziaren eguna eta San Fermin ospakizunarekin batera, ekimen andana baten gailurra izan zen. Hona ekitaldiaren argazki erreportaia.

Chascomuseko EEaren 20 urtemuga 2011 01

[Zingirako Euskaldunak-en 20. urtemugan, egoitzako areto nagusiari euskal etxearen sortzaile izan zenaren izena jarri zitzaion. Jose Maria Larralde erakundeko lehendakaria ere izan zen agintaldi batzuetan eta egoitza propioa lortzeko bideratzaile nagusia (argazkia EE)]

Chascomuseko EEaren 20 urtemuga 2011 02

[Plaka desestali aurretik, Zingirako Euskaldunak euskal etxeko lehendakari Pedro Mauregui Larrandak, Elena Lasalviak eta Cesar Arrondok hitz batzuk zuzendu zizkieten bildutako lagunei (argazkiaEE)]

Chascomuseko EEaren 20 urtemuga 2011 03

[Milagros, Mariana eta Martin, Jose Larralderen seme-alabak, ere egon ziren presente omenezko zeremonian (argazkiaEE)]

Chascomuseko EEaren 20 urtemuga 2011 04

[Aretoko plaka desestali ondoren, lore sorta bat utzi zuten Bautista Errecart eta Jorge Etchepare batzordekide ohiek Gernikako arbolaren kimuaren oinarrian. (argazkiaEE)]

Chascomuseko EEaren 20 urtemuga 2011 06

[Uztailaren 9an bertan, iluntze aldera, Nuestra Señora de la Merced katedralean Meza elizkizun bateko partaide izan ziren Chascomuseko euskaldunak (argazkiaEE)]

Chascomuseko EEaren 20 urtemuga 2011 07

[Ekintza askotako eguna izan zen uztailaren 9a Zingirako Euskaldunak-eko kideentzat. Arratsaldeko 8etan bertako Pilota Klubean hitzarmen bat sinatu zuten euskal etxeko lehendakariak eta kirol erakundeko presidentea den Roberto del Rek. Helburua, bi instituzioen arteko loturak indartzea, Euskal Herriko kultura eta batez ere euskal pilota zabaltzen jarraitu ahal izateko. (argazkiaEE)]

Chascomuseko EEaren 20 urtemuga 2011 08

[Ehunka lagun bildu ziren Chascomuseko Fortin-en afaria partekatzeko. Euskal etxe askotako kideak bertaratu ziren jai lekura, tartean, FEVAko lehendakariorde Arantxa Anitua, Cañuelaseko zuzendaritza batzordekide eta dantzariak, eta La Platako Euzko Etxea, Mar del Platako Denak Bat, Necocheako Euzko Etxea, Suipachako Gure Txokoa, Buenos Aireseko Laurak Bat eta hiri bereko Iparraldeko Euskal Etxea-ko ordezkariak (argazkiaEE)]

Chascomuseko EEaren 20 urtemuga 2011 09

[Gaua osoan zehar euskal dantza anitz ikusi ahal izan ziren dantza taldeen eskutik. Chascomus bertako Eusko Hazia, Buenos Airesko Accion Vasca eta Cañuelasko Denak Bat euskal etxeko dantzariek beren koreografia onenak eskaini zizkioten publikoari (argazkiaEE)]

Chascomuseko EEaren 20 urtemuga 2011 11

[Euskal etxeko txikienek ere izan zuten beren momentua (argazkiaEE)]

Chascomuseko EEaren 20 urtemuga 2011 12

[La Platako Unibertsitateko irakurlegoko irakaslea den Idurre Lekuonak ere hartu zuen parte jaian euskarazko mezu bat irakurtzen (argazkiaEE)]
Chascomuseko EEaren 20 urtemuga 2011 13
[Afariaren markoan aipamen berezi bat egin zitzaien Juan Mutuberria eta Martin Echeverria muslari eta pilotariari (argazkiaEE)]



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia