150.000 dolar eman dituen ezezagun bati esker salbatu da euskal arrantxua duen Los Encinos parke kaliforniarra

2012/01/24

Amestoy familia Los Encinos Parkeko etxean (argazkia Los Encinos Historic Park)

PUBLIZITATEA

Ezezagun batek egin duen emari bati esker beste urte betez mantendu ahalko da irekita Kaliforniako Los Encinos parkea. Bertan gordetzen den euskal arrantxu historikoa estatu honetan eraiki zen zaharrenetakoa da. Parkea ixtear ziren arduradunak, estatuak egin dituen aurrekontu mozketak behartuta, baina San Fernando bailarako bizilagun batek egin duen ekarpen eskuzabalari esker irekita mantenduko da. Garnier izeneko bi anai frantsesek eraki zuten arrantxua 1800 bukaeta aldera eta harrezkero euskaldunen jabetza izan da, lehenik Gaston Oxarart aldudarrarena eta ondoren Amestoy familiarena, Euskal Kazeta albistari euskal-amerikarrak argitara eman duenez.

San Fernando, AEB. 150.000 dolar eman dituen ezezagun bati esker salbatu da, momentuz, Los Encinos State Historic Park delakoa. Emariaren albistea Los Angeles Times bezalako egunkarietan agertu da egunotan. Euskal Kazeta albistari elektronikoak azaltzen duenez, parkearen barruan dagoen euskal arrantxua 1800 bukaera aldera eraiki zuten Phillippe eta Eugene Garnier anaiek. Ardiak hazten zituzten eta "Kaliforniako hegoaldeko artilik finena" egiten omen zuten, parkearen webgunearen arabera. Ez dakigu ziur euskaldunak ote ziren, baina bai inguruko euskaldunekin harreman handia zutela. Garniertarren barbakoek inguruko euskalduna asko eta asko biltzen zituzten, Nancy Zubiri kazetariaren “A Travel Guide to Basque America” liburuaren arabera.

1878an Gaston Oxarartek erosi zuen arrantxua. Oxarart Alduden jaioa zen, Iparralden, eta Argentinara emigratu zuen Kaliforniara heldu aurretik. Bera hil zenean Simon Gless ilobak jaso zuen arrantxua, eta honek bere aitaginarrebari, Domingo Amestoy euskaldunari, saldu zion. Gless eta Amestoy Oxarartekin batera heldu ziren AEBetara Argentinatik.

Parkeak urtebetez irautea lortu badu ere, bere aldeko kanpainak aurrera darrai, epe luzerako finantziazioa lortzeko helburuarekin. Informazio gehiago “Save Los Encinos Historic Park” kanpainaren webgunean.

Jatorrizko berria, ingelesez, Euskal Kazeta-n, hemen.