euskalkultura.eus

Laprida, Argentina. Helburu argi eta sendoekin jaio zen duela hamar urte Arturo Campion Euskal Ikasketa Gunea. “Euskal kultura eta Argentinako mugimendu abertzalea ikasi eta zabaltzen duten ikerlari, irakasle, historialari eta euskal gizataldeko ordezkariak biltzeko asmoarekin sortu da gure elkartea. Gure asmoa baliabideak batzea da, ikerketa berriak sortzeko xedearekin. Euskal kultura hedatzea da gure helburu nagusia, hemen eta Argentinatik kanpo. Horretarako hitzaldi sorta, tailerrak eta ikus-entzunezko materiala eskainiko ditugu. Beste helburuen artean, Unibertsitate eta Ikasketa beste gune batzuekin kontaktatzea ere bada eta Euskal Herriko eta baita Diasporako izen handiko gonbidatuak ekartzea ere”, hitz hauekin aurkeztu zuten beren burua Arturo Campion Euskal Ikasketa Guneko arduradunek 2003ko apirilaren 5ean.

Orain, hamarkada bat pasa eta gero, hasierako helburu horiek betetzen joan direla ikus daiteke. Eta horren froga, eta laburpen giza, Ikasketa Guneak 2005etik argitaratzen duen ‘Guregandik’ aldizkaria da. Izan ere, urteroko argitalpenak instituzio anitzeko egileen lanak biltzen ditu.

Datorren otsailaren 11an, eta Inauterietako jai egunak baliatuz, 2013ko bilera ospatuko dute Lagunen Etxea Euskal Etxearen egoitzan Ikasketa Guneko kideek. Bilkurak honako egitarau hau jarraituko du:

Goizean:

- Partaideen harrera eta gosaria
- Bazkaria Arturo Campion Euskal Ikasketa Guneko kide, euskal etxeko agintari, kide eta lagunen artean.

Arratsaldean:

-Barne lana: 2012. urteko balantzea: elkarteko kideek FEVAren kultur eskaintzan emandako hitzaldiak; Guregandik 2012ko edizioa; Palermo Unibertsitateko Mintegia; Guregandik 2013ko edizioa.

-Hitzaldiak: 2013an FEVAko eskaintzan sartuko diren Arturo Campion Euskal Ikasketa Guneko kideen hitzaldiak; ikerketak eta mintegiak La Platako eta Buenos Aireseko Unibertsitateetan.

-Elkarteko hiruhilabeteko buletina.

Iluntzean:

-19:00etan, Prentsaurrekoa. 2012ko Guregandik-en aurkezpena. Aitor Pescador Medrano-ren hitzaldia.

Gauean:

-10. urtemugako afaria.
Laprida herriko inauterietan parte hartzeko aukera.