euskalkultura.eus

San Miguel, Argentina. Hamalau ikaslek hartu zuten parte joan den apirilaren 16an Askatasunaren Bideak antolatutako euskara tailerrean eta bigarren topaketarako 20 batek eman dute dagoeneko izena. Urtean zehar zortzi klase gauzatuko dira -- hilean behin -- helburu zehatz bati jarraituz: San Miguelgo euskaldunen ondorengoek euren arbasoen hizkuntza ezagut dezaten.

Eskolak hiriko Museo Historikoan hasi dira, oso leku berezi eta preziatua euskal jatorrizko jendearentzat: “Museo Historikoa dagoen eraikuntzan General Sarmiento Geltokiko nasa zegoen duela hamarkada batzuk. Eta garai hartako esne-saltzaileek oraindik gogoratzen dute hona heldu ziren euskaldunek petankan eta pilotan jokatzen zutela eta ulertzen ez zen hizkuntza batean mintzatzen zirela”, azaldu dio Horacio Marotto Etxezaharrek EuskalKultura.com-i. “San Miguelen euskal jatorrizko jende ugari dago, eta hiria sortu zenetik euskara irakasteko erronka bere gain hartzen duen lehenengo erakundea gara”, jakinarazi digu Marottok.

Klaseak emateko ardura Marina Aranguren irakaslearena da. Aranguren, FEVAk eta HABE institutuak kudeatzen duten Argentinan Euskaraz proiektuan trebatu da eta HABEko 2. profila du. “Esker beroak eman nahi dizkiegu irakasleari eta baita Museoko agintariei ere euren instituzioko ateak ireki dizkigutelako”, adierazi du, bukatzeko, Askatasunaren Bidea-ko bultzatzaile nagusia den Horacio Marottok.