Donostia-San Sebastian. Euskararen Nazioarteko Eguna ospatuko da datorren abenduaren 3an, eta urtero legez Eusko Ikaskuntza internet bidez ekimen honen aldeko ekarpenak biltzen ari da. Aurtengo deialdia Eusko Ikaskuntzako Ei Gazte! Sariaren irabazleak, Blanca Lopez de Juan Abad gasteiztarrak, proposatutako ideia da: euskararen hitzik ederrena aukeratzea.

Dagoeneko sarean dira proposamen batzuk jada, tartean Bernardo Atxagak, Benito Lertxundik edo Pedro Miguel Etxenikek, adibidez, aukeratutakoak. Eta zer esanahi ote dute Altxalilia, Txantxurtxue, Aloso edo Martxirdil hitzek? Jakin nahi duenak webgunera jo beharko du. 

Diasporatik ere egin dituzte batzuk ekarpenak jada: Elaine Mendina euskal-uruguaitarrak adibidez, Txaparra aukeratu du, gazteleraz utzitako iruzkinean.

Bota zuk zeurea! Bidal ezazu zure proposamena hona.

Orain arteko proposamen batzuk:

Bernardo Atxaga

BABES
“Nik Babes hitza aukeratu dut bere soinuagatik, “B” hotsa lehenengoa delako gure bizitzan, oinarrizkoa. Bere esanahiagatik beragatik ere. Aldi berean, denok ezagutzen eta ulertzen dugun hitz bat delako.”

Benito Lertxundi

ARGIÑABARRA
“Ikaragarri gustatzen zaidan hitz bat da eta hitzetik-hortzera erabiltzen dudana.
Erdi piktorikoa da, kromatikoa, argi-koloreekin jolasten duena eta kutsu poetiko baita misteriotsu bat daukana."

Pedro Miguel Etxenike

AMATXI
“Hitzak ez du azalpenik behar.”