euskalkultura.eus

Mexiko DF, Mexiko. Instituto Nacional de Estudios Históricos de las Revoluciones de México delakoari esker, Mexikon euskal ondorengoen bila ari direnek informazio iturri interesgarri bat dute eskuragarri sarean. Vascosmexico.com webgunea eta posta zerrendari esker izan dugu sareratzearen berri. Egiaz 2012an plazaratu zen interneten informazioa, baina kontsulta-gune baliagarria delakoan aipatzeak merezi duela uste dugu.

Josu Ruiz de Gordejuela historialari eta Diasporan adituak bildu ditu "Guía de Vascos y Navarros en México. Siglo XIX" zerrendako artxiboak. Bertan, XIX. mendean zehar Mexikora etorri ziren 4.700 euskaldunen datuak agertzen dira. Zerrenda immigranteen lehen abizenaren arabera dago antolatuta, alfabetikoki. Abizenaren ondoan honako datuak aurki daitezke: izena, sortu zeneko herria/probintzia eta jaiotze data, egoera zibila, bizilekua, lanbidea eta informazio iturria (alegia, ze dokumentutan topa zuen ikerleak). 

Zerrenda kontsultatu nahi dutenentzat egileak aholkatzen du abizen jakin batzuen kasuan aukera desberdinak bilatzea. Adibidez, kontuan izatea Echevarria abizena Bizkaian eta Araba iparmendebaldean horrela idazten dela, baina Gipuzkoan, Nafarroan eta Araba hegoaldean Echeverria dela. Iparraldean, aldiz, Etcheberry izan daiteke. Horrez gain, artxiboetan Chevarria edo Cheverria bezala jasota ager daiteke, eta XX. mendetik hona Etxebarria edo Etxeberria idazten da.

Liburua PDF formatoan deskargatzeko, jo hona.