euskalkultura.eus

Valparaiso, Txile. Vanesa Arozamena Ingeles Filologia lizentziatua da (Deustuko Unibertsitatean), baina euskal kultur arlora zuzendu zuen jarraian bere bidea eta literatura idatzi eta oralari buruzko tesia egin zuen Minnesotako Unibertsitatean (“The Interaction between Orality and Literacy in the Basque Country” izenburua du tesiak). Orain, euskal munduen ikerketan darrai; zehazki, Txileko euskal komunitatean sakontzen.

Valparaison unibertsitateko kide ohiak omen ditu ikerlariak, eta gainera, bere senarrarekin batera urtean behin lan-bidaia egiten du bertara. Hortik sortu zitzaion interesa, eta gero gaian sakontzeko aukera izan zuen Rubila Araya Ariztia kazetariaren “Arrojos, dichas y nostalgias: Vascos en el Valparaíso del siglo XX” liburuari esker. Liburu horren bidez ezagutu zuen Arozamenak Valparaisoko Eusko Etxea eta azken bisitan bertan izan da.

Egonaldi honetan Rubila Arayarekin bildu zen Arozamena eta ikerketari buruzko ikuspuntuak eta ideia trukatu zituzten. Ikerlariak Txilen jaio diren euskaldunen ondorengoen belaunaldi berriak hartuko ditu laneko ardatz gisa: “ikusi egin nahi dut nola mantentzen dituzten euskera, oroimena, tradizioak eta euskal kultura, eta baita Eusko Etxeak lan horretan duen garrantzia ere".

Hori dela eta, egonaldian Eusko Etxeko presidentea, Archibaldo Uriarte, elkarrizketatu zuen Arozamenak. Uriartek bere esku jarri zituen elkarteko artxiboak. Ere berean, euskal etxeko zenbait gazteei ere elkarrizketa egin zien, esaterako Francisco Javier Pinedo eta Valezka Rojasi.

Hiri txiletarrean hainbat egun eman eta gero, Vanesa Arozamena AEBetara bueltatu da, baina Eusko Etxearekin ikerketa eta elkarlana jarraitzeko eta sakontzeko asmoarekin. Archibaldo Uriartek abegi onez hartu zuen lankidetza proposamena; bere esanetan "Diasporako toki desberdinetako pertsona eta erakundeen artean sortzen diren harreman hauek beti dira ongi etorriak eta ekarpen handia dira gure helburu amankomunerako, oroimena berreskuratzeko eta kulturari jarraibidea emateko".