euskalkultura.eus

Santiago, Txile. Elkarretaratze hau Viña-Valparaisoko Eusko Etxeak Urchueguia ordezkariarekin izan duen lehenengo kontaktua izan da, otsailaren 23an izendatu bazuten ere ordezkari berria ez baita oraindik Txilera bizitzera etorri eta oraingo bidaia hau, Echeniquerekin --honek euskal komunitateko eta txiletar gobernuko solaskideen aurrean aurkez dezan-- izan baita orain arte Lasarteko alkate izan den politikariaren aurreneko lan-urratsa Txilen. Izan ere, Euskadin dauzkan kontuak bukatzen ari da oraindik Urchueguia, eta horiek bideratutakoan hasiko omen da buru belarri bere kargu berriko obligazioekin.

Lehenengo bilera honetan, ordea, Viña-Valparaisoko Eusko Etxekoek aukera izan zuten elkarteak garatzen dituen ekimenen berri emateko, baita euren kezka, asmo eta arazoak agertzeko ere, kultura, gizarte eta kirol mailan. Eta ez zuten batere ahaztu otsailaren 27ko lurrikarak euren egoitzan egindako kalteak aipatzea, dardarak eraikinaren egitura eragin eta arriskutsu bilakatu baitu, elkartea egoitzarik gabe utziz.

[Txile eta Perurako Euskadiren ordezkari berri Ana Urchueguia; Archibaldo Uriarte, Viña-Valparaisoko Eusko Etxeko lehendakaria; eta Guillermo Echenique, Jaurlaritzako Kanpo Harremanetarako idazkari nagusia, Euskadiren Ordezkaritzan, Santiagon]

Jaurlaritza ordezkatzen zuten bi solaskideak arretaz entzun zuten mahaigaineratutakoa eta ongi hartu zituzten planteatutako kezka eta eskeak eta Jaurlaritzak lagunduko diela hitz eman zuten, Archibaldo Uriartek bileraren ondoren aipatzen zuenez.

Gonbidapena ordezkari berriari

"Bilera adeitsua eta gure ikuspuntutik arras positiboa izan da euskal etxearentzat", laburbiltzen zion Uriartek EuskalKultura.com-i. "Gonbitea luzatu diogu Ana Urchueguia andereari lasaixeago bisitatu eta Valparaiso eta Viña del Mar-eko euskal gizataldea agurtzera etor dadin, bere kargu eta lan berri garrantzitsuari ekin ondoren".

1943an fundatu zen Valparaisoko Eusko Etxeko lehendakariak aukera baliatu zuen euskal agintariei eskerrak emateko "lurrikara eta itsasikararen ondoren Txileko euskaldunez erakutsi zuten kezka eta arrenguragatik", e-mail eta telefono bidezko komunikazioak berreskuratu zituzteneak "telefonoi dei pertsonala egin baitzion Euskaditik Kanpo Harremanetarako idazkari nagusiak gure euskal etxeko lehendakariari, aldi berean Patxi Lopezen agurra eta interesa ere transmitituz", esan zuen Archibaldo Uriartek.