euskalkultura.eus

Santiago, Txile. Txileko Euzko Etxeak hainbat jarduera egin zituen joan den abenduan, eta ohi bezala Berriketari albistari digitalak zabaldu ditu lau haizetara, bere lagun eta bazkideen artean eta Txileko euskal berriak eskuratu nahi diztuzten (doan da) jendeen artean oro har. Ekimenen baitan, aipagarria da, adibidez, elkarteko Euskal Abesbatzak abenduaren 25ean Santiagoko Katedralean eman zuen kontzertua. Koruari esker Euskal Herriko gabon kantek ere izan zuten lekua ekitaldi honetan. 

[Fernando Parada, abesbatzeko kidea, 'Hator hator, mutil etxera' kanta ezaguna abesten Santiagoko Katedralean (argazkia Berriketari)]

Abesbatzak beste ekimen batzuk garatu egin zituen hilean zehar, hala nola, Ama Kaputxinoen Komentuko Elizan eman zuten kontzertua (abenduaren 8an) edo Violeta Parra de la Pintana eskolan egin zuten gizarte ekintza: ikasle onenei datorren ikasturterako materiala oparitzea. 

Abesbatza bera eta Itxaropen Gaztea dantza taldea izan ziren elkarteko beste ekimen bateko protagonista: Auco herrira egin zen bazkide osteratxoan emanaldia eskaini zuten Auco-ko Santa Teresita-ren santutegian. Koruak mezan kantatu zuen eta elizaren kanpoaldean dantza taldeak emanaldi bikaina eskaini zuen.

[Itxaropen Gaztea dantza taldeko kideak Auco-ko santutegiaren elizpean dantzari (argazkia Berriketari)]

Euzko Etxean egin diren bestelako ekimenen artean, aipagarriak dira abenduan ere egindako Euskararen Eguneko jaia, gazte ugari bildu zituena, eta 'Nueva Filarmonía' orkestraren kontzertua, Cristian Errandonea euskal-txiletarraren gidaritzapean. Berriketari aldizkariaren harpidedun egiteko edo bertako arduradunekin harremanetan jartzeko, bidali e-maila berriketari@gmail.com helbidera.