"Zorion perfektua" Birmingham-en, bihar abiatuko den Euskal, Katalan eta Galiziar Zinema Sailean
Birmingham-eko Unibertsitateak bihar bertan jarriko du abian Euskal, Katalan eta Galiziar Zinema Sailaren hirugarren edizioa, bertan hiru hizkuntzok irakasten dituzten irakurletzek eta kultura sailek antolatuta. Zinemaldia euskal film batekin hasiko da: Jabi Elortegiren "Zorion Perfektua", Anjel Lertxundi idazlearen izen bereko eleberrian oinarritua. Zuzendaria emanaldian izango da eta lanari buruz hitz egingo du bertaratzen diren ikusleekin.
"Emak Bakia baita" dokumentala Chiapasen, San Frantziskon eta Vancouverren izango da maiatzean
Nazioartean ibilbide arrakastatsua egiten ari da Oskar Alegria zuzendari nafarraren "Emak Bakia baita" dokumentala. Madrilgo Mataderoko Cinematecan emanaldi jendetsuak egin dira eta bihar Bilboko Alhondigan aurkeztuko du Alegriak, Harkaitz Cano idazlearekin batera, Gutun Zuria Letren Jaialdiaren baitan. Maiatzean, nazioartean bidea egiten jarraituko du: Chiapas, San Frantzisko, Vancouver eta berriz ere San Frantziskon, oraingoan Basque Cultural Center-en.
Zortzi euskal film emango dituzte Amsterdameko "Epa! Film Week" zinemaren astean
Amsterdam euskal zinemaren erakusleiho bilakatuko da apirilaren 30etik maiatzaren 6ra. Epa! Film Week-ek Euskal Herrian ekoitzitako zortzi film eta hainbat film labur emango ditu Herbeheretako hiriburuan, bi gazteren ekimenez. Gogotsu eta ilusio handiz ari dira lanean euskal zinemaren aste hau arrakastatsua izan dadin eta datorren urtean ere Amsterdameko zinema aretoetan euskara entzun dezagun.
Bi euskal film luze saritu ditu Nantesko Zinemaldiak: "Emak bakia baita" eta "Miel de naranjas"
Urtero legez, Nantesko Zinemaldiak leku zabala eskaini dio euskal zinemagintzari, "La Fenetre Basque" atalarekin. Aurten, horrez gain, bi euskal filmek saria jaso dute jaialdian: Oskar Alegria iruinsemearen “Emak bakia baita" filmak Dokumental Onenaren saria eskuratu du, eta Imanol Uriberen "Miel de Naranjas" lanak Ikusleen Saria. Etxepare Institutuak euskal film horien partehartzea sustatu du eta Aizpea Goenaga, erakundearen zuzendaria, bertan izan da.
Euskararen aldeko eguna Pariseko Eskual Etxean, Laburbiraren emanaldiarekin eta Korrika 18rekin
Pariseko euskaldunek hitzordu bikoitza dute bihar Eskual Etxean; izan ere, euskal zineaz eta Korrikaz gozatzeko aukera izango dute. Euskal Etxeak Laburbira euskarazko film laburren zirkuituko emanaldia egingo du arratsaldean eta Euskal Herrian eginiko zortzi lan ikusgai izango dira bertan. Aurretik, elkarteak Korrikarekin bat egiteko gonbitea luzatu die hiriko euskaldunei. Arratsaldeko bostetan jarri dute hitzordua, euskal etxean.
Londresera eta Parisera helduko da aurten Laburbira euskarazko film laburren jaialdia
Topaguna Euskara Elkarteen Federazioak Laburbira euskal film laburren jaialdiaren hamargarren edizioa antolatu du aurten. Atzo bertan abiatu zen zinemaldi ibiltari hau, Erandion, eta martxoaren 29a birtartean Euskal Herriko eta Diasporako hainbat tokitara eramango du iaz eginiko euskal film laburren sorta ederrra. Ostiralean, esaterako, Londresera helduko da, London Basque Society euskal etxeak antolatu duen ekitaldiari esker. Martxoaren 23an, berriz, Pariseko Euskal Etxean izango dira ikusgai.
Euskal zinema ikusgai bihar abiatuko den Guadalajarako Nazioarteko Zinemaldian, Mexikon
Guadalajarako Nazioarteko Zinemaldia bihar bertan hasi eta martxoak 9a arte luzatuko da. Mexikoko zine topaketa garrantzitsuena da jaialdi hau eta aurten, aurreko edizioetan bezala, euskal zinemak leku nabarmena izango du bertan, izan ere, hiru euskal filme lehiatuko dira zinemaldiko sail ofizialean, Etxepare Euskal Institututak jakinarazi duenez. Film luzeen atalean Pablo Bergerren “Blancanieves” eta Lander Camareroren “What about Columbus” dokumentala izango dira ikusgai eta, laburrei dagokienez, Telmo Esnalen "Hamaiketakoa".
"Bertsolari" dokumentalaren emanaldiak jakinmina piztu zuen Kaliforniako Stanford unibertsitatean
Munduan zehar harrera oso ona izaten ari da Asier Altuna zuzendariaren "Bertsolari" filma eta nazioarteko ikusle askok interes handiarekin jaso dute bertsolaritzaren mundua era poetiko eta ulergarrian azaltzen duen lan hau. Horrela izan zen ere iragan azaroaren 28an, Kaliforniako Stanford unibertsitatean. Euskara eta euskal kultura irakurletzaren baitan antolatu zen emanaldia, Euskararen Nazioarteko Egunaren karira, eta bertara hurbildu ziren ikasle zein irakasleek saioaren ondorengo galdera-erantzunen tartean gaiari buruzko jakinmin handia erakutsi zuten.
Mar del Platako Zinemalditik pasa ondoren Fermin Muguruzaren 'Zuloak' Buenos Airesen ikus daiteke
Fermin Muguruzaren hirugarren proiektu zinematografikoa da 'Zuloak' eta aurreko ‘Libano’ eta ‘Marruecos’ bezala, hau ere estreinatu da Argentinan. Mar del Platako Zinemaldian izan ondoren, ‘Zuloak’ Buenos Airesera iritsi zen joan den ostegunean astebeterako geratzeko, eta beste hainbeste luzatzeko aukerarekin. Muguruzak berak aurkeztu zuen dokumentala ostiralean, hiriburuko Constitucion auzoko Arte Cineman burututako emanaldi berezi batean. Muguruzaren ‘Libano’ eta ‘Marruecos’ filmak, bestalde, Buenos Airesko Arabiar Zinemaldiaren II. edizioan proiektatu dira eta "Bondi a Palestina" jaialdian hartu du parte Muguruzak, kontzertua ere eskainiz.
Hiru urtetako lanaren emaitza, Argentinako Euskal Diasporari buruzko ‘Guk’ filma, sarean ikusgai
Sarean jarri eta lehengo hamar egunetan 2500 deskarga izan zituen Nuria Vilaltak zuzendutako ‘Guk, nosotros’ izeneko dokumentalak. Egileen esanetan “Guretzat, ekipoarentzat, pozik egoteko 2500 motibo”. Dokumentala, hiru urte luzeen fruitua, “Argentinako Euskal Diasporak, gaur egun, Euskal Herriko politikan duen paperari buruzko dokumental independiente bat da” eta on line ikus daiteke www.guknosotros.com web orrian. “Proiektua gauzatu ahal izateko, asko izan dira lagundu digutenak: profesional teknikoak eta Argentinako euskaltasuna biziarazten duten hainbat protagonista; batik bat, horiei esker ‘Guk, nosotros’ filme bilakatu da”, azpimarratu digute dokumentalaren arduradunek.
