Euskaraz idatzitako lehen liburuaren ingelesezko bertsioa aurkeztu dute aste honetan Bilbon
Bernard Etxepareren 'Linguae Vasconum Primitiae' (1545) liburuaren ingelesezko bertsioa elkarlanean argitaratu dute Reno-Nevadako Unibertsitateko 'Center for Basque Studies' (CBS) edo Euskal Ikasketa Zentruak eta Bizkaiko Foru Aldundiak. Aurkezpena Josune Ariztondo Bizkaiko Foru diputatuak eta CBSen Lagunen Elkarteko lehendakari Pello Salaburuk egin dute aste honetan Bilbon. Beñat Oyharcabal-en hitzaurrea eta Pello Salabururen aintzin-solasa dauka.
Euskal poesia mundura, Brno-n eta New Yorkeko PEN World Literature Voices jaialdiko irakurraldiekin
Azken asteotan euskal poesiak mugak hautsi ditu eta munduko bi txoko urruneraino heldu da: Txekiako Brno hirira eta New Yorkera. Lehen kasuan, Brnoko Unibertsitateko Euskara eta Euskal Kultura irakurletzak antolatutako “Chansons d’amour, ilargi beterik gabeko gauak” poesia gauean entzun ahal izan dira euskarazko olerkiak. Bigarrenean, aldiz, Tere Irastortza idazlea New Yorken izan da PEN World Voices literatur jaialdian parte hartzen.
"Andrea" eleberrian Brasilgo pilotazaleen istorioak bildu ditu Arantxa Ugartetxea donostiarrak
Brasilgo euskal Diasporarekin harreman sakona du Arantxa Ugartetxea donostiarrak; izan ere, zortzi urtez bizi izan zen Sao Paulon 80. hamarkadan. Garai hartan ezagutu zuen hiriko Club Atlético Paulistano, euskal pilotazale amorratu talde batek osatua. Brasildar hauek zesta puntarekin duten grinak eta pasioak inspiratuta, Arantxak eleberrira bildu ditu herrialde honetako pelotariek bizi izan dituzten abenturak eta istorio harrigarriak. "Maite dute zesta puntaren ikusgarritasuna, pilotak otarra jotzen duenean egiten duen soinua", azaldu digu Arantxak.
Liburuaren Eguna ospatzeko ekimen berritzaileak Bartzelonako eta Sydneyko euskal etxeetan
Datorren asteartean, apirilaren 23an, Liburuaren Eguna ospatuko da nazioartean eta munduko zenbait euskal etxek literatura eta, bereziki, euskal literatura, sustatzeko ekitaldiak antolatu dituzte. Horretan eskarmentua du Bartzelonako Euskal Etxeak; izan ere urteak daramatza euskal letrei eskainitako Literaldia jaialdia antolatzen. Horren baitan, Twitter bidez 140 karaktereko mikroipuinak eta taldean sortutako ipuintzarra ari dira osatzen. Sydney-ko Gure Txokok, bere aldetik, ideia sinple baina eder batez ospatuko du eguna: elkarteko bazkideek euskal olerkiak irakurriko dituzte, ordubeteko irakurraldian, eta ondoren liburu trukea egingo dute.
Bihartik aurrera Literaldia jaialdiak euskal literaturaren uzta berria ekarriko du Bartzelonara
Bartzelonako Euskal Etxeak antolatuta, bihar abiatuko da Literaldiaren aurtengo edizioa. Euskal literaturaren azken emaitzak Kataluniara ekarriko ditu jaialdiak, narrazioa, poesia eta ipuinak musikarekin uztartuz hilaren 27a bitartean. Besteak beste, Harkaitz Cano, Karmele Jaio eta Kirmen Uribe idazleak izango dira hirian, euren lanak --zenbait dagoeneko katalanera itzuliak-- erakusteko. Bihar bertan, Juantxo Skalari musikariak "Mensajes, anti-canciones y poemas de kalle" liburu-diskoa aurkeztuko du, kontzertu batekin.
Gaztelaniaz argitaratu da "A death without company", Wyomingo euskal munduan girotutako nobela beltza
Walt Longmire sheriff-a AEBetako nobela beltzeko pertsonaiarik ezagunetarikoa da egun, eta bere istorioetan oinarritutako telebista sailak bigarren sasoia du aurten. Craig Johnson idazleak sortu du Longmire eta dagoeneko bederatzigarren eleberria argitaratu da. Siruela argitaletxeak gaztelaniara itzuli berri du saileko bigarren alea, "A death without company" ("Una muerte solitaria"). Bertan Longmire-ek Mari Baroja euskalamerikarraren heriotza ikertuko du. "Euskaldunak Oesteko parte dira eta nire erantzunkizuna da mundu hau zintzotasunez deskribatzea", azaldu dio idazleak EuskalKultura.com-i.
Kirmen Uriberen "Mussche" eleberria gaztelaniaz argitaratu da, katalanez eta galegoz ere plazaratu berritan
Kirmen Uribe ondarroarraren azken eleberria, "Mussche", hiru hizkuntzatara itzulia izan da aste honetan: katalanez, galegoz eta gaztelaniaz aurkeztu dute Edicions 62, Xerais eta Seix Barral argitaletxeek, hurrenez hurren. Liburua iazko abenduan plazaratu zuen Susa argitaletxeak eta harrera oso ona izan zuen (Durangoko Azokako euskarazko libururik salduenetakoa izan zen). "Lo que mueve el mundo" izenburua hartu du eleberriak gaztelaniaz.
Ingelesez egin den aurreneko euskal literaturaren antologia argitaratu du Center for Basque Studies-ek
AEBetako Nevadako Unibertsitateko Center for Basque Studies nazioarteko ikerketa guneak "Basque Literary History" liburua aurkeztu zuen atzo Donostian. Lan hau euskal literaturari buruz ingelesez idatzi den lehendabiziko antologia da eta Mari Jose Olaziregi Euskal Filologian doktorea eta Etxepare Institutuko Euskararen Sustapenerako zuzendaria izan da edizioaren arduraduna. Berarekin elkarlanean, honako hamabi adituek jorratu dituzte antologiako atalak: Jesús María Lasagabaster, Igone Etxebarria, Joxerra Garzia, Aurelia Arkotxa, Beñat Oyharçabal, Jean Haritschelhar, Lourdes Otaegi, Patri Urkizu, Xabier Altzibar, Xabier Etxaniz, José Manuel López eta Estibalitz Ezkerra.
Atxagaren unibertsoa ikusgai izango da Madrilen, 'Obabakoak' eleberriaren 25. urteurrena dela eta
Obabakoak eleberriaren 25. urteurrena kari, Madrilgo kulturgune nagusienek Bernardo Atxaga idazlearen unibertsoa erakutsiko dute, martxoaren 20tik apirilaren 7a bitartean eskainiko duten programazio bereziarekin. Hitzaldiak, zinea, antzerki lanak eta Atxagari buruzko ikus-entzunezko baten estreinaldia egingo dira, besteak beste, Centro Dramático Nacional, Casa del Lector eta Matadero Madrid zentroetan, Etxepare Euskal Institutuarekin elkarlanean.
Castillo Suarez, Leire Bilbao eta Itxaro Bordaren poesiak jakinmina piztu zuen Dublinen
"Forked Tongues" izeneko poesia antologiaren argitalpena dela eta, Dublinen izan berri dira Castillo Suarez, Leire Bilbao eta Itxaro Borda olerkariak. Liburuak hiru euskal egileen eta Miren Agur Meaberen poesiak ingelesera itzuli ditu, zenbait galiziar eta kataluniar idazleen lanekin batera. Euskal olerkariak Dublinen izan ziren euren olerkien irakurraldiak eskaintzeko, eta emanaldiek jakinmin handia piztu zuten, eurekin bertan izan zen Mari Jose Olaziregi Etxepare Institutuko Euskara zuzendariaren esanetan.
