Lagun bat doanean... Norma Rios Buenos Airestik idazle Beñat Minondoren ustekabeko heriotzaz
"Lagun bat doanean hutsunea geratzen da, beste lagun baten iristeak bete ezin duena... dio Alberto Cortes kantautore argentinarraren kantuak. Igande arratsaldean telefonoak deitu zuen eta ahots triste batek nire lagun Beñat hila zela esan zidan. Tristezia handik batek hartu ninduen eta buruan irudi-sail bat hasi zitzaidan itzulika, film emanaldi bat izango bailitzan. Ezin nuen entzun berria nuena sinetsi eta aurpegitik behera malkoak kontrolik gabe hasi zitzaizkidan isurtzen". Buenos Airestik, bertako CVF-Iparraldeko Euskal Etxeko idazkari den Norma Riosek bidali dizkigu lerro hauek.
Pierra Lako, Euskal Argentina elkartea eta Iparralde-Argentina harremanak, Norma Riosen aburuz
Norma Riosek artikulu hau sinatzen du Euskal Argentinaz, aurten elkarte honen orain arteko lehendakari Pierra Lakok lekukoa Monika Legartori pasa diola-eta. Pierra 1990etan bidaiatu zen Argentinara lehen aldikoz, hara joana zen osabaren arrastoaren gibeletik. Arrakasta ukan eta kusiak eta bere familia argentinarra ezagutu zuen Pierrak. Horrek egoera berean dauden jendeei laguntzeko Euskal Argentina sorrera eragingo zuen. Elkarte honek Ipar Euskal Herriaren eta Argentinaren arteko harremanak sustatu ditu, Buenos Airesko Iparraldeko Euskal Etxea ere lankide. Hori guztia hartzen du hizpide CVFko idazkari den eta bera ere langintza horretan laguntzaile den Norma Rios emazte atxiki euskal-argentinarrak.
Urtebetetzea: Txileko Santiagoko Euzko Etxea bere Mendeurrena ari da ospatzen (1912-2012)
2012ko martxoa da eta Txileko hiriburuko euskal komunitatea urtebetetze jaietan dabil, ehun urte betetzen ari baita martxo honetan Santiagoko Euzko Etxea. Urte osoan zehar ospatzekotan da. Bihar bertan egingo duen 'Euskal Jaia' delako batetik abiatuta, Euskal Herritik etorri diren lau sukaldari bizkaitar hautu protagonista, euskal gastronomia eta kulturari eskainitako ekitaldian. Izan ere, hain aukera berezia partekatzeko eta Txilen industria, merkataritza eta turismo arloan lor daitekeen lankidetza ikertzeko Santiagon da ordezkaritza bizkaitar zabal bat, bertako Foru Aldundiak eratua. Txileko euskal etxe dekanoaren historiaz gehiago jakitearren, gainbegirada bat eskatu diogu Pedro Oyanguren EEko artxibozain eta betidaniko kideari.
Euskal txiletar filosofo eta idazlearen heriotzaren aurrean: 'Castor Narvarte, amaiera gabeko beste erbeste bat'
Joan den astean zendua da Txilen Castor Narvarte Sanz, jaiotzez euskalduna, Txilen hazia eta txiletarra bizilekuz eta adopzioz, Diasporako euskal familia bateko aita eta aitona, seme eta bilobak Euskal Herrian, Txilen eta Estatu Batuetan zeuzkana. Idazle eta filosofoa, bere ekoizpena, bere ekarri intelektuala eta Diasporako euskaldun gisa eman zigun lekukotasuna utzi digu herentzia. Hamaika Bide Elkartetik (Euskal Erbesteen Kultura Ikertzeko Elkartea da Hamaika Bide) honako artikulua iritsi zaigu zendu berria oroituz, Jose Angel Ascuncek eta Jose Ramon Zabalak sinatua, 'Castor Narvarte, amaiera gabeko beste erbeste bat' izenburupean.
'Euskaldunak Denak Bat' Euskal Etxearen 90. urteurrena Arrecifesen, Argentinar Errepublikan
Aste gutxi dira Argentinako Arrecifes-en, bertako euskal elkarteak, 1921ko azaroaren 20an 'elkarri laguntzeko elkarte' gisa sortu zen 'Euskaldunak Denak Bat'ek, 90 urte bete dituela. Buenos Aires probintzian kokatzen den euskal erakunde honetako partaide den Juan Lucio Agotegaray-k lerro batzuk idatzi eta igorri dizkigu bere bigarren etxea den honen aipatu efemeridea gogora ekartzeko. Nafarroa eta Xiberoko euskaldunen ondorengoa da egilea, bere izaera eta jatorria azkar bizi dituena Arrecifesko euskal etxearen magalean.
Pergaminoko Roberto Arregui oroituz, euskaldun zintzo eta Lagun Onak-eko sortzaile eta lehendakari ohi
"Laurogeita gehiago urte zituela utzi gaitu Roberto Arreguik. Nork jar zitzakeen zalantzan bere sustrai euskaldunak? Aitarengandik hartu zuen deituraren entzute hutsarekin lotura zuzena egiten da bere jatorriarekin eta, hala ere, bigarren deitura emendatuz geroz --Kantauri itsasoko hiri eta portuaren izena dena, Bilbao-- ezbairik ez zegoen bere gipuzkoar/bizkaitar lurrarengandik aldendu nahi zuen edonoren aurrean". Honela hasten da joan den ostiralean La Opinión de Pergamino egunkariak sinatu eta argitara emaniko oroitzapen artikulua, Buenos Aires probintziako herri honetako euskal etxeko sortzaile, lehendakari ohi eta kide izan den laguna gogoan.
Kepa Junkera, Boisen grabaketak egiten: "Erabat harritu nau jendearen eskuzabaltasunak eta harrera onak"
Kepa Junkera Estatu Batuetan ari da bizitzen zenbait hilabetez, familia eta guzti, grabatzen, emanaldi batzuk eskaintzen eta datorren diskorako materiala prestatzen. Aurretik ere euskal diasporarekin aritu izan bada ere, oraingo egonaldia, Estatu Batuetan, bertako euskal komunitatea askoz hobeto eta sakonago ezagutzeko parada ari zaio ematen. Duela oso gutxi astebetez aritu zen lanean Boisen, hor ere materiala biltzen, grabatzen eta euskaldunekin harreman estuan. Karia horretara honako lerroak idatzi eta eman zituen argitara maiatzaren 20ean Deia egunkarian.
Vicente Emparan protagonistetako bat, gaur duela 200 urte Venezuelak Independentzia aldarrikatu zuenean
Gaurko egunez, duela 200 urte, Venezuelak bere Independentzia aldarrikatu zuen. Apirilaren 19a Venezuelako Independentziaren festa gailur gisa ospatzen da geroztik, Independentziarako prozesu osoko eragile eta ekile nagusien artean euskal izen asko topa daitezkeelarik, izan ere Venezuela osatzeko eman diren gertakari abertzale guztietan gertatzen den bezala. Baina Apirilaren 19 honetan, bi mende biribil, 200 urte, betetzen dira Venezuela Espainiako Erregearengandik askatu zenez geroztik, hasiz 1821eko Uztailaren 24an Caraboboko batailarekin amaituko zen prozesua, eta beraz itxiz Caracasko hirian hasi zen prozesu independentista. Honi guztiari buruz eta nazio venezuelarrari eta euskaldunei buruz egin duen gogoeta banatzen du gurekin Caracastik Pedro Javier Arriagak.
Buenos Airesen, Iparraldeko Euskal Etxea bere 114. urteurrena ari da ospatzen aste honetan
Munduan izen honekin den euskal etxe bakarrak, Iparraldeko Euskal Etxeak edo Centro Vasco Francés delakoak --bi izenak erabiltzen dituzte bertakoek--, sortu zeneko 114. urteurrena ospatu du aste honetan. 1895eko apirilaren 1ean sortua, urte gutxi batzuk geroago, 1901ean, pasatu zen oraindik ere bere egoitza izaten segitzen duen egungo eraikinera, hiriburu argentinarrean. Urteurrenaren karietara, bertako Kultura Azpibatzordeko kide eta sustatzaile den Norma Riosek honako artikulua idatzi eta bidali digu, guri eta gure irakurleei ere aukera emanez urteurrenarekin bat egin dezagun.
3.000
Aste honetan bere hiru milagarren zenbakira iritsi delarik, honako zutabea argitaratu du zenbaki berezi horretan Baionako euskal kazetako zuzendari den Janbattit Dirassar-ek. EuskalKultura.com-etik geure edalontzia bildu nahi dugu Herriako eta euskal prentsa osoko lagunengana eta topa egin elkarrekin urtebetetzearendako, hasteko. Lerro hauek omenaldi izan daitezela 1944tik hona eta lehenagotik --Diasporatik ere-- euskal kazetaritzaren sua bizirik atxiki dutenen ohore. Zorionak Herria-ko Janbattit, Peio, Emile, Maixan, Jean... Eta Emile Larrek aste honetako zenbakian berean esaten duen gisan, "Biba, segur, holako gizonak eta emazteak, lehengoak eta heldu direnak. Iraun dezala bai, holakoak eman eta emaiten dituen HERRIA".
