"Apalabrados", mugikorrentzako joko ezaguna, euskaraz ere arrakastatsu
Iragan abuztuan aurkeztu zen "Apalabrados" jokoaren euskarazko bertsioa eta harrezkero asko dira jolasarekin engantxatuta gelditu diren euskaldunak. Mugikorretan eta Facebook bidez jokatzen da "Apalabrados" eta euskaraz gain gaztelaniaz, ingelesez, eta katalanez ere badago, beste zenbait hizkuntzen artean. Jokoaren sortzaileak, Maximo Cavazzani argentinarrak, euskaraz dagoeneko 25.000 partida jolastu direla dio eta euskal erabiltzaileen komunitateak gora egiten jarraitzen duela.
Itzuleraren fenomenoa aztertuko dute bihar Deustuko Unibertsitatean emigrazioari buruzko jardunaldian
Deustuko Unibertsitateak Euskal Herrira itzuli diren Diasporako kideei emango die hitza bihar, Bilboko kanpusean emigrazioari buruz egingo den jardunaldi batean. Hizlariak Veronica Domingo (Argentina), Laura Igantzi (Estatu Batuak), Izar Errandonea (Uruguai) eta Irantzu Leunda (Venezuela) izango dira, eta Joseba Etxarrik, EuskalKultura.com-eko zuzendariak, gidatuko duen mahainguruan parte hartuko dute. Aurretik, Pedro J. Oiarzabal historialariak Bizkaira itzuli den emigrazioari buruzko hitzaldia emango du.
Ehun lagundik gora bildu ziren igandean Arrosan 2012ko 'Amerikanuak Lunch' bazkarira
Iragan igandean Amerikanoen urteroko bazkariaren edizio berri bat egin zen, oraingoan Nafarroa Beherako Arrosa herrian. Ehun lagundik gora bildu ziren bertara; batzuk AEBetan lan egin ostean Euskal Herrira itzuli diren euskaldunak, eta beste zenbait bisitan etorri ziren euskal-amerikarrak. Bertan izan zen ere Ainara Puerta Larrañaga historialaria eta berak idatzi du jarraian argitaratzen dugun kronika. Puerta euskal emigrazioa eta emigranteen itzulerari buruzko lana egiten ari da (e-Etorkinak), Deustuko Unibertsitateko Pedro J. Oiarzabal eta Nerea Mujika zuzendari [kronika EuskalKultura.com-ek euskaratua].
Zigilu honekin hartu du gogoan Uruguaiko Postak Euskal Erria Euskal Etxearen Mendeurrena (1912-2012)
Iragan astean aipatzen genuenez, Uruguaiko Posta Zuzendaritza Nazionalak bat egin du Montevideoko Euskal Erria Euskal Etxea ospatzen ari den Mendeurrenarekin eta izan ere zigilu berezi bat plazaratuz egin du, efemeridea bildurik. Daniel Pereyrari zor zaion diseinuaren 15.000 ale atera dira, horierariko bakoitza 37 pesoko balioduna. Zigiluak pilota jokoa (hain zuzen ere jai-alai edo zesta-punta) erakusten du ezkerreko irudian, eta horren ondoan Gernikako Arbola eta Juntetxea. Horiekin honako hitzak: "Institución de Confraternidad Vasca Euskal Erria 1912-2012" eta ikurrin bat, barnean zigiluaren prezioa duela, 37 peso uruguaitar.
Erresuma Batura erbesteratu zituzten Gerrako Umeei omenaldia egin zieten Southamptonen
Duela 75 urte heldu ziren lehen aldiz Ingalaterrara, bakarrik eta beldurtuta, gurasoak 1937ko gerra eta bonbardeketen artean utzita. Iragan asteburuan ume horietako batzuk, orain edadetuta, Southamptonen bildu ziren eta omenaldia jaso zuten, euren etorreraren 75. urteurrenean. Omenaldiaren antolatzaileak Basque Children of '37 elkarte ingelesa eta Eusko Jaurlaritza izan ziren. Euskal ordezkaritzaren buru Idoia Mendia Bozeramaile eta Justizia Sailburua eta Guillermo Echenique Kanpo Harremanetarako Idazkari Nagusia izan ziren.
La Platako Herritar Ospetsu izendatu dute Jorge Heguy, Euzko Etxea-ko lehendakari-ohi eta buruzagia
Atzo irakurtzen genuen Buenos Aires probintzia argentinarreko kazetetan: Jorge Heguy, La Platako Herritar Ospetsu izendatu du La Plata probintziako hiriburuko Kontzeju Deliberatzaileak, zinegotzi guztien sostenguarekin eta organo horretako presidente Javier Pacharottik proposatuta. Jorge Heguy oso pertsona ezaguna da La Platako eta Argentina osoko euskal komunitatean. Hiriko Euzko Etxean, kontu ikuskatzaile ordezkoa da gaur egun, eta urteetan zehar beste zenbait kargu ere bete ditu euskal elkartean, tartean baita lehendakariarena ere.
Berlingo Euskal Etxeak hiriko Gernika Plazan omenaldia egingo du, 1937ko bonbardaketaren egun eta ordu berean
Gernikaren Bonbardaketaren 75. urteurreneko ekitaldiekin darrai Berlingo Euskal Etxeak, eta hilean zehar jarduera ugari egin eta gero, ostegun honetan burutuko du ekitaldi nagusia, apirilaren 26ean, naziek bizkaitar herria erasotu zuten egun berean. Omenaldia Berlingo Guernica Platz izeneko enparantzan egingo da, bonbardaketa gertatu zen ordu berean. Euskal Etxeak alemaniar elkarteen parte hartzea lortu du eta ekitaldian plazaren inguruko elizek kanpaiak joko dituzte.
Eraskusketa ibiltari batek Gernikako bonbardaketaren memoria zabalduko du Europa eta Ameriketako 50 hiritan
Eusko Jaurlaritzak eta Gernikako Bakearen Museoak herri bizkaitarraren bonbardaketaren lekukotza munduan zabalduko duten erakusketa ibiltari sorta bat aurkeztu dute gaur goizean. Sei erakusketa dira guztira, eta ostegun honetan inauguratuko dira Brusela, Buenos Aires, Txileko Santiago, Bogota, Mexiko eta New Yorken. Ondoren Europako eta Ameriketako beste 44 hiritan izango dira ikusgai datozen hilabeteetan, bonbardaketaren 75. urteurrena dela eta.
Larunbatean egingo da Galdakaon Euskal Herrian bizi diren Euskal-Venezuelarren XVII. Topaketa
Beste behin --eta hamazazpigarrena da jada-- Venezuelako euskal diasporarekin harremana duen lagun talde bat bilduko da Galdakaon, Euskal-Venezuelarren Urteroko Topaketaren baitan. Lagunarteko bilera da topaketa hau eta helburua Venezuelan jaio edo bizi izan diren euskaldunak biltzea da, aspaldiko lagunak ikusteko eta harremana mantendu ahal izateko. Aurtengo bazkaria Galdakaoko Batzokian egingo da, eta Amaya Zenarutzabeitia antolatzaileak EuskalKultura.com-i baieztatu dionez, dagoeneko 60 lagundik gora eman dute izena. Azken egunak dira izena emateko bertaratu nahi dutenentzat.
Euskal ordezkaria, Maria Milagros Castañeda, Immigrantearen Erregina Probintziala hautatua Concordian
Euskal gizataldearen ordezkaria, Ibaiko Izarra Euskal Etxeko kide den Maria de los Milagros Castañeda Arletaz hautatu dute atzo igandez Entre Rios probintzia argentinarreko Concordian Immigrantearen Erregina Probintziala. 'Mili', lagunek esaten diotenez, ikaslea da Unibertsitate Teknologiko Nazionalean eta 22 urte dauzka. Hasieratik adierazi zuen euskaldunen ondorengoen ordezkari duin eta aktiboa izateko bere engaiamendua, euskal enbaxadari gisa jarduteko, eta euskaldunen eta euren kulturaren berri emateko asmoa bere erregin-agintaldian. Bestalde, bertako euskaldunek euskal stand-a ipini eta Concordiako Gazte Lurra taldeko dantzariak ere aritu ziren Immigrantearen jaiaren baitan.
