Hitzak euskaraz nola ahoskatzen diren jakin nahi? Ahozko Hiztegian, hitzak sarean entzungai
Entzun daitekeen hiztegi bat da Ahozko Hiztegia, tresna baliagarria zalantzarik gabe hitzak nola ahoskatu behar diren ikasi nahi duenarentzat. Azkue Fundazioa eta Bizkaiko Foru Aldundia laguntzaile, Euskarazko Ahozko Hiztegia ipini da orain sarean, euskara batuan hitzak zelan esaten diren argitzen diren doaniko tresna. Laukian, topatu nahi duzun hitza sartu eta entzuteko ikonotxoan sakatuz ahots batek hitza irakurriko dizu. Egin zazu aproba.
Euskal Zinemaldia eta Alemaniako Igo Euskarazko Literatura Saria abiatu ditu Frankfurteko irakurletzak
Frankfurteko Goethe Unibertsitateko Euskara eta Euskal Kultura irakurletzak makina bat jarduera egin ditu ikasturtean zehar. Egindako lanari amaiera biribila emateko beste bi ekimen abiatu ditu lektoretzak: batetik, dagoeneko martxan dagoen euskal zinema emanaldia; eta, bestetik, Alemanian egin den lehendabiziko Euskarazko Literatura lehiaketa. Herrialde honetan bizi diren euskera ikasleek parte har dezakete; lanak bidaltzeko epea ekainaren 28an amaituko da.
Ehun urte bete dituen Gernikako Arbola kantuaren grabazioa Berlinen izan zen entzungai
Berlingo Euskal Etxeak antolatuta Inaxio Lopez de Arana itzultzaile eta ikertzaileak hitzaldia eman zuen Alemaniako hiriburuan iragan astelehenean. Lopez de Aranak Rudolf Trebitsch etnologo austriarrak 1913ko udan egindako euskal grabazio musikalak aztertu ditu eta haiei buruz solastu zen. grabazio horien artean aipagarria da Gernikako Arbola abesti ezagunaren aurreneko grabazioa. Biharamunean, Leipzigeko Unibertsitatean eman zuen bigarren hitzaldia, hango Euskara eta Euskal Kultura irakurletzak gonbidatuta.
Atzerriko euskara ikasleak Portugaleten izan ziren Ibilaldiak gonbidatuta euskal hizkuntzaren festaz gozatzeko
Portugaleteko Asti Leku ikastolak antolatuta, igandean egin zen aurtengo Ibilaldia, Bizkaiko ikastolen jaia. Bertan, Euskal Herri osoko milaka euskaltzalerekin batera, gonbidatu berezi batzuk ere izan ziren: Alemania, Ingalaterra, Italia, Txekia eta Poloniako hamaika euskara ikasle. Batzuk maila bikaina dute, Poznango Alicja-k, esaterako, eta beste batzuk ikasten hasi berriak dira, baina bisita euskararen jai hau ezagutzeko aukera bikaina izan zen denentzako. Osteguna arte izango dira Euskal Herrian, ikastolako ikasleen familiekin bizitzen.
Folk musika, euskal dantza eta zinema izan dira Hungariako 2013ko Euskal Astearen ardatza
Euskal astea ospatu zen iragan maiatzaren 4tik 10era Hungariako Budapest eta Szeged hirietan, azken honetako unibertsitateko Euskara eta Euskal Kultura Irakurletzak antolatuta. Dantza eta musika izan ziren protagonista Euskal Astearen aurreneko bi egunetan, eta hungariarrek sena eta abilezia erakutsi zuten Dantza-plaza izeneko ekitaldi jendetsuetan. Ondoren, Szeged-eko Unibertsitatean egin ziren zine emanaldiek ere harrera beroa izan zuten.
Ostegunera arte ari da Budapesten Hungariako Euskal Kultur Astea, euskara irakurletzak antolatuta
Etxepare Institutuak Hungarian sustatzen duen Euskara eta Euskal Kultura Irakurletzak antolatuta, iragan larunbatean Euskal Astea abiatu zuten Budapesten. Inaugurazio ekitaldian musika izan zen protagonista, euskal doinuak eta hungariar tradizioa uztartu zituen kontzertu eta dantza saio batekin. Gaurtik eta ostirala bitartean, jardunaldion baitan Euskal Herrian egindako lau film ikusteko aukera izango dute hungariarrek: "Blancanieves", "Los amantes del Círculo Polar", "Gazta zati bat" eta "Kutxidazu bidea, Ixabel".
Aizpea Goenaga eta MariJose Olaziregik UNLP bisitatu dute, Pello Mari Otaño katedra sortzea hizpide
Etxepare Institutuko Aizpea Goenaga eta Marijose Olaziregi, erakunde horretako zuzendaria eta Euskara Suspertzeko zuzendaria hurrenez hurren, Buenos Aires probintziako La Plata hiriburuan egon dira bisitari eta bertako UNLPko Euskara eta Euskal Kultura irakurletzaraino iritsi dira, ikasleekin elkarretaratuz eta Unibertsitateko presidentearekin bilduz. Bisita, Euskadiren Argentina-Mercosur-erako ordezkari Sara Pagolarekin egin dute, La Platako Euzko Etxeko agintariak ere agurtu dituztela. La Plata eta Buenos Aires utzita, Etxeparekoek Txilerako bidea hartu zuten.
Polonieraz bertsotan aritu ziren Poznango euskara irakurletzako ikasleak Euskal Egunak jaialdian
Poznango 'Dni Baskijskie' edo Euskal Egunak jaialdiak euskal kultura hiri poloniarreko kaleetara atera zuen iragan astean, apirilaren 23tik 25era bitartean. Etxepare Euskal Institutuak Adam Mickiewicz Unibertsitatean duen euskara irakurletzak antolatu zuen ekitaldia eta, aurreko edizioetan bezala, ikasleak buru-belarri engaiatu ziren antolakuntzan eta jardueretan. Amaia Dones irakurleak polonieraz eginiko bertso saioa eta hiriko kultur elkarteen lankidetza azpimarratu dizkio, besteak beste, EuskalKultura.com-i.
Euskal Asteburua antolatu du Artea EEak: Mallorcan 48 orduz euskara hutsean bizitzeko aukera bakana
Larunbat eta igande honetan nahi duenak euskal asteburua bizitzeko aukera bikaina izango du Mallorcan, Artea Euskal Etxeak antolatu duen barnetegiari esker. Ikastaro trinko honek arrakasta handia izan du aurreko edizioetan, eta oraingoan ere euskal hizkuntza izango du oinarri, baina horrez gain euskara ikasgeletatik aterako dute eta beste zenbait ekitaldietara zabalduko dute. Horrela, euskaraz biziko dira 48 ordu hauetan, euskal dantza ikastaroak, txalaparta lantegiak, afariak eta bestelako ekimen ugari eginez.
HABE Ikasbilek sarean jarri du "Gramatika gaitasuna lantzen" liburua, online egiteko ariketekin
HABEren Ikasbil webguneak euskara ikasi eta lantzeko aukera berria jarri du eskuragarri, doan, Euskal Herriko eta mundu osoko ikasleentzat. "Gramatika gaitasuna lantzen" liburua sareratu du HABEk, eta horrez gain, hainbat ariketa online egiteko egokitu ditu. Liburu honetako teoria eta autozuzendutako ariketak 3. mailako ikasleei zuzenduak dira (hau da, C1 mailako ikasleei). Horrez gain, Ikasbilek euskara ikasleentzako irakurketa gida bat ere jarri du sarean, pdf formatuan eta irakurgaiei buruzko ariketekin (oraingo honetan, A1 mailatik hasi eta 4. maila bitartekoak).
