Eusko Jaurlaritza partaide Diasporaren Foro Globala egingo da gaur eta bihar Dublinen
Dublinen da Eusko Jaurlaritzaren Kanpoan den Euskal Komunitatearentzako zuzendaria, Asier Vallejo, Diasporaren Foro Globalean parte hartzeko. Gaur eta bihar egingo dira foroaren lan-saioak eta Vallejok zenbait lantegi eta elkarretaratzetan parte hartuko du. Foro hau AEBetan jaio bazen ere, mundura zabaldu da eta aurten Irlandak bilduko du Europako atala. Mintegia diasporako komunitateei zuzenduriko topagunea da eta diaspora eta sektore pribatu, erakunde publiko eta gizartearen artean harremanak sortzea du helburu.
Etxepareko zuzendari Aizpea Goenaga Buenos Aireseko Nazioarteko Liburu Azokan izan da; bihar Txilen izanen
Argentina dira egunotan Etxepare Euskal Institutuko zuzendari Aizpea Goenaga eta Euskararen Sustapenerako zuzendaria, Mari Jose Olaziregi, herrialde honetako euskara eta kultura arloko eragileekin zenbait bilera egiteko asmoz. Atzo, esaterako, Buenos Aireseko Nazioarteko Liburu Azokan eta Juan de Garay eta Laurak Bat elkarteekin izan ziren, besteak beste. Gaur La Platako Unibertsitate Nazionalean euskara eta euskal kultur irakurletzako ikasleekin topaketa egingo dute.
Euskal Komunitatearentzako Zuzendariak Brasilen amaitu zuen Hegoameriketara lehen bidaia
Asier Vallejok, Kanpoan den Euskal Komunitatearentzako zuzendariak, iragan larunbatean amaitu zuen Brasilen Hego Ameriketara egin duen lehen bidaia ofiziala. Biraren balioespena baikorra da; izan ere, hamar eguneko egitarau trinkoan Txile, Argentina, Uruguai eta Brasilgo euskal elkarteekin harremanak sustatzeko aukera izan du. Brasilen, bidaiaren azken txanpan, Sao Pauloko bi euskal etxeekin eta Rio Grande do Sul estatuko elkarte gaztearekin bildu zen Vallejo. Aurretik, Uruguaien, herrialde honetako elkarteen ordezkariekin hartu-emana izan zuen eta Montevideoko alkatearekin ere bilera egiteko aukera izan zuen.
Euskadiren etorkizuna Europarekin lotuta dagoela adierazi du Iñigo Urkullu lehendakariak Bruselan
Iñigo Urkullu lehendakaria Bruselako euskal komunitatearekin bildu zen atzo, "Europaren bihotzera" egin duen lehen bidaia honetan. Ekitaldira bildu zirenen artean Europako erakundeetan lanean diharduten euskal politikari eta teknikariak izan ziren, baita Bruselako Euskal Etxeko ordezkariak ere. Bidaiaren lehendabiziko egunean Urkullu Europako Batzordeko presidente Jose Manuel Durão Barrosorekin bildu zen; gaur Europar Kontseiluko presidente Herman Van Rompuyrekin egingo du topaketa.
Eusko Jaurlaritzak Ibon Mendibelzua izendatu du Euskadiren Ordezkari Mexikon
Eusko Jaurlaritzaren Gobernu Kontseiluak atzo Gasteizen eginiko bileran --astelehenera aurreratua Urkullu lehendakaria Bruselan baita gaur, europar hiribururako bere lehenenego bidaia ofizialean-- Ibon Mendibelzua Madariaga Euskadiren Ordezkaria Mexikon izendatu zuen. Izendapen honekin, Jaurlaritzaren bulego mexikarrak Ibarretxerekin zeukan Ordezkaritza maila berreskuratzen du, Patxi Lopezen gobernuarekin New Yorkeko Ordezkaritzaren menpe jarria baitzen.
Iñigo Urkullu lehendakaria Van Rompuy eta Durao Barrosorekin bilduko da Bruselan bihar eta etzi
Europako erakundeetako arduradun nagusiekin bilduko da bihar eta etzi Iñigo Urkullu lehendakaria, Bruselara egingo duen bi eguneko bidaian. Bihar Europako Batzordeko presidente Jose Manuel Durão Barrosorekin, Europako Batzordeko presidenteorde eta Lehiakortasun Batzordeko buru Joaquin Almuniarekin eta Barne Gaietako Batzordeko buru Cecilia Malmströmekin bilduko da. Etzi, aldiz, Europar Kontseiluko presidente Herman Van Rompuyrekin egingo du bilera. Era berean, Lehendakariak Bruselako euskal komunitateari harrera egingo dio Euskadiren ordezkaritzaren egoitzan, eta, besteak beste, Bruselako Euskal Etxea bilduko da bertara.
Txilen izan ostean, Euskal Gizataldeentzako zuzendaria, Asier Vallejo, Argentinara heldu da
Gaur iritsiko da Txiletik eta astelehenera arte egon go Argentinan Asier Vallejo Itsaso, Kanpoko Euskal Gizataldeentzako zuzendaria, Hegoameriketara egiten ari den bidaiaren baitan. Herenegun hasi zuen bidaia, Txilen, eta bertako euskal etxeekin bildu zen zuzendaria. Berarekin izan zen Rafael Kutz, Txile eta Perurako Euskadiren Ordezkaria. Argentinan --eta ondoren Uruguain eta Brasilen- Mercosurrerako ordezkari Sara Pagolaren laguntza izango du Vallejok.
Apirilaren 1etik abian ipini du Eusko Jaurlaritzak Boiseko bere Bulego berria
Apirilaren 1etik abian da Eusko Jaurlaritzak Boisen (AEB) duen bulego berria, Kanpoko Euskal Komunitateentzako Zuzendaritzaren baitangoa den Miren Perez Egireun lizentziatu bilbotarra buru. Bulegoa, Idaho Estatuaren eta Eusko Jaurlaritzaren artean sinatutako akordioetan aurreikusten da, eta New Yorkeko Euskadiren Ordezkaritzaren pean dago. "Boisetarrei eta Mendebaldeko euskaldunei nire agurrik beroena helarazi nahiko nieke eta Boiseko bulegoaren ateak zabalik izango dituztela jakinarazi; euren ideiak eta ekimen-proposamenak entzuteko eta aztertzeko guztiz prest nago", adierazi dio Miren Perez Egireunek EuskalKultura.com-i.
Jaurlaritzak Euskadiko Ordezkari berriak izendatu ditu AEBetan, Ander Caballero, eta Txilen, Rafael Kutz
Eusko Jaurlaritzaren Gobernu Kontseiluak bi izendapen berri onartu ditu gaur goizean Kanpo Harremanetarako arloan, hain zuzen ere Ander Caballero Barturen izendatu du Estatu Batuak, Kanada eta Mexikoko Ordezkaritzako buru, eta Rafael Kutz Garaizabal, Txile eta Peruko Ordezkaritzako. Aurretik, otsailaren 26an, Argentina, Brasil, Paraguai eta Uruguaiko Ordezkari izendatu zuen Sara Pagola.
Bizkaiko Foru Aldundiak eta ia ehun enpresek merkataritza misio bat hasiko dute gaur Mexikon
Bizkaiko Foru Aldundiak, Bilboko Merkataritza Ganberarekin lankidetzan, gaur abiatuko du Mexikon bost eguneko enpresa bidaia. Helburua herrialde honetan Bizkaiko enpresentzako negozio aukerak sustatzea da. Euskal ordezkaritzako parte dira Bizkaiko 47 ETE eta makina erreminta (AFM), automozio (ACICAE), ingurumeneko industrien (Aclima) eta Bilboko Portuko clusterrak. Orotara, 94 enpresa ari dira bidaian parte hartzen, ETE-en eta clusterretako kideak diren enpresen artean.
