Indianoak 2013 espedizioa Miq'mak herriaren gurari onekin abiatu zen Trois Pistoles-etik
Igandean abiatu ziren Quebec-eko Trois Pistoles herritik Indianoak 2013 espedizioko arraunlariak. Ibaialde elkarte lapurtarrak eta Quebeceko Euskaldunak Euskal Etxeak antolatu duten egitasmo honetan Saint Laurence ibaian gora 500 kilometro egingo dituzte bidaiariek, antzinako baleazaleen antzera. Asteburuan bestea eta zenbait kultur ekitaldi egin ziren Trois Pistoleseko Parc de l'Aventure Basque en Amerique museoan. Horien baitan, Miq'mak herriko emakume batek trainerua babesteko zeremonia bat egin zuen. Gurari on horiekin, bidean dira Indianoak!
"Obabakoak"-ek 25 urte: Atxagaren eleberria izango da Klasikoen 6. Irakurketako protagonista
Bernardo Atxaga idazlearen "Obabakoak" eleberria 25 urte bete ditu aurten eta urteurrena ospatzeko berau aukeratu dute ostegunean egingo den Klasikoen 6. Irakurketa Jarraituaren izar. Goizeko zortzietatik hasita, Arriaga Antzokian Atxagaren maisulana irakurriko dute jarraian, hala pertsonaia ezagunek nola irakurle anonimoek. Horien artean izango dira ere hogei bat euskal etxetako irakurleak, bideo bitartez. Halaber, Arriaga Antzokiko plazan gaurtik eta ostegunera bitartean, eleberriaren 25 urteak direla eta, zenbait ekitaldi egingo dira.
Igandean Quebec-eko Trois Pistoles herritik abiatuko da Indianoak 2013 espedizioko euskal trainerua
Ibaialde elkarte lapurtarreko hamalau arraunlariak atzo abiatu ziren Quebec aldera eta gaur helduko dira Trois Pistoles hirira. Han, Parc de la Aventure Basque euskal museoan ekingo diote Indianoak 2013 espedizioari: 500 kilometro Saint Laurence ibaian gora, garai bateko baleazaleen legean, Montrealeraino. Ibaialdek Quebec-eko euskal etxea izan du lagun egitasmo honetan, eta Euskaldunakeko lau bazkide izango dira traineruko tostarteko. Bidaia kultur truke gisa ulertzen dute Ibaialdeko kideek, eta etapa bakoitzaren ostean euskal kultur erakustaldiak eta gastronomia lantegiak egingo dituzte herriz-herri.
Txakolinaren lilurak 600 lagundik gora bildu zituen New Yorkeko hirugarren Txikifest jaira
Zintzurra txakolinarekin bustitzeko aukera ederki baliatu zuten ia 600 newyortarrek iragan ekainaren 2an, Txikifest jaiaren hirugarren edizioaren baitan. Txikito euskal jatetxeko jabeak --Eder Montero eta Alex Raij-- orain hiru urte hasi ziren festa hau antolatzen, txakolina hiri honetan ezagutzera emateko, eta arrakasta itzela izan du ekimenak. Aurten, Bizkaiko Foru Aldundiaren sostenguarekin antolatu zen jaia eta ia 700 botila edan ziren. Bertan bildutako ia 10.000 dolarrak "Sanctuary for Families" GKEarentzat izango dira.
600 euro irabazi nahi? Asma ezazu euskal itzulpena "Healthy Basque Fast Food" kontzeptuarentzat
Jakiberri (I+D+i) ikerkuntza egitasmoak euskal 'fast food' janaria, baina osasungarri eta naturala sustatzea eta zabaltzea du helburu. Horretarako, lehenik eta behin ideiari berari izena jartzeko beharra ikusi du egitasmoak eta, hori dela eta, lehiaketa bat abiatu du. Partehartzaileek “Healthy Basque Fast Food” (Euskal Janari Azkar Osasuntsua) kontzeptua euskarara itzuli behar dute. Deiturak noski, gogoraerraza eta erakargarria izan behar du. Proposamenak, nahi adina, internet bidez bidali behar dira ekainak 28a baino lehen eta irabazleak 600 euro jasoko ditu. Jakiberrik EuskalKultura.com-i baieztatu dionez, Diasporako euskaldunek ere parte har dezakete lehiaketan.
Txakolin Eguna Manhattan-en: Txikifest jaialdiaren hirugarren edizioa egingo da igandean New Yorken
New Yorkek txakolina maite du eta horren irudi da Txikifest jaialdiaren arrakasta. Aurten hirugarren edizioa izango du Manhattan-eko Txakolin Egunak, eta, aurrekoetan bezala, 500 bat lagun espero dituzte antolatzaileek. Festaren sustatzaileak Txikito jatetxeko jabeak dira: Eder Montero sukaldari bilbotarra eta Alex Raij newyorkatarra. Ekimenak Bizkaiko Foru Aldundiaren laguntza du eta aurten 16 txakolindegien ardoak izango dira dastagai.
Julitxu Gysling Zubillaga, euskal-argentinar bat Gipuzkoako Abesbatzen Federazioaren buru
Julia "Julitxu" Gysling Zubillaga necochearra Euskal Herrian bizi da orain 21 urte eta iragan apirilaren 27az gerotik Gipuzkoako Abezbatzen Federazioaren presidente berria da. Julitxuren bizitza musikari lotua izan da betidanik; izan ere, bost urterekin hasi zen abesten Hipolito Zubillaga aitonak zuzentzen zituen bi koruetan. Aitona, Necocheako Euskal Etxearen sortzaileetako bat, berebiziko eragina izan duen pertsona izan da bere bizitzan, harengandik jaso baitzuen musikarekiko eta euskal kulturarekiko maitasuna. Harreman hori dela medio, Euskal Herrian etxean bezala sentitu izan da beti Julitxu, eta lur honi makina bat gauza zor dizkiola aitortu dio EuskalKultura.com-i, horien artean "bi seme, lagunak, mota guztietako esperientziak eta iraskapenak eta MUSIKA, letra larriz".
Euskal Herrian bizi diren Euskal Venezuelarren Topaketak 18. edizioa bete du aurten Galdakaon
Hemezortzigarren edizioa bete du aurten Euskal Herrian bizi diren Euskal Venezuelarren urteroko Topaketa eta egunpasak, Simon Bolivar elkarteak deiturik. Ia ehun lagunek erantzun zioten deiari. Galdakaoko tabernetan poteotxo bat egin ostean, meza egin zen hildako lagunak gogoan, ondoren Elexaldeko Aretxondo jatetxean bazkaltzeko. EuskalKultura.com elkarretaratzeko lekuko izan zen.
Estatu Batuetako euskaldunentzat: Zatoz "au pair" bezala Euskal Herria ezagutu eta euskara praktikatzera
Deia ingelesa mintzo duten Diasporako euskaldunentzat da. "Au pair" bezala aritzea beti da esperientzia aberasgarria: haurrekin lanean trebetasunak garatzeaz gain, tokiko pertsonak, hizkuntza eta kultura ezagutzeko bide aparta da. Gasteizko familia euskaldun bat Diasporako "au pair" baten bila dabil, sei eta zortzi urteko bi neska-mutiko zaintzeko; delako pertsonak ingelesez egin beharko lieke haurrei, eta familiarekin euskara edo gaztelania ere ikas/praktikatuko luke. Aukera bat izan daiteke Euskal Herria ezagutu eta euskararekin aurrera egiteko.
Limako Arantzazuko Amaren Kofradiak eta Anaidiak Aberri Eguna ospatu zuten Peruko zazpi hiritan
Aberri Eguneko ospakizunak Peruko zazpi hiritara zabaldu dira aurten, Limako Arantzazuko Amaren Kofradiak eta Anaidiak sustatu duten ekimenari esker. Kofradiak jakitera eman duenez, euskaldunek eta euskaldunen ondorengoek bat egin zuten ekitaldiotan eta meza eta afariekin ospatu zuten egun hau Limako egoitzan, eta Puno, Arequipa, Trujillo, Cajamarca, Jauja eta Ica hirietan.
