Asier Vallejo, Kanpoan den Euskal Komunitatearentzako zuzendaria: "Euskadi eta Diaspora ontzi berean gaude"
Kanpoan den Euskal Komunitatearentzako zuzendaria, Asier Vallejo, Dublinen izan zen iragan astean, Diasporaren Foro Globalean parte hartzeko. Estatu Batuak sustaturiko topagunea da foroa, nazioarteko diasporen eta euren sorterrien arteko harremanak eta ekimenak, ekonomikoak zein gizartekoak, bultzatzea helburu duena. Topaketaren baitan, Vallejoren taldeak zenbait herrietako esperientziak aztertu ditu, hala nola Irlanda eta Eskoziakoak. Bi herrialde hauek inbertsioak eta hainbat ekimen gauzatu dituzte AEBetako irlandar eta eskoziar diasporekin lankidetzan. Jarraian, Deia egunkariak Vallejori egin dion elkarrizketa laburtu eta euskaratu dugu.
FEVAk euskal etxeei programatzeko eskaintzen dien 2013ko hizlari eta hitzaldi sorta plazaratu du
Argentinako FEVAk (euskal elkarteen federazioak edo euskaraz ofizialki Euzko Argentinar Bazkun Alkartasuna izena duen erakundeak) aditzera eman berria du 2013rako, kide dituen euskal etxeen esku ipintzen duen hizlari eta hitzaldi zerrenda, nahi dutenek euren kultur ekitaldien barne sar ditzaten. Tratuaren arabera, FEVAk garraio gastuak ordaintzen dizkie hizlariei, eta euskal etxe interesatu bakoitzak bere gain hartzen ditu bertako ostatuak-eta. 18 gai eta 9 hizlari biltzne ditu 2013ko zerrendak.
Abian dira Perun Pasiotarren Ordenaren etorreraren Mendeurreneko ekitaldiak
Iragan asteazkenean hasi ziren Liman Pasiotarren Ordenak Perun egin dituen 100 urteen ospakizunak. 1913. urtean heldu ziren lehen erlijioso pasiotarrak, eta, horien omenez, hainbat ekitaldi egingo dira herrialde honetan urtean zehar. Mendeurrena pregoi batekin abiatu zen, hiriburuko San Isidroko El Olivar kultur zentroan. Limako Arantzazuko Amaren Kofradiak eta Anaidiak ekitaldiotara batzeko asmoa agertu dute. Gaur meza emango da Peruko aurreneko pasiotar gotzainak izan ziren Monsinore Venancio Orbe Celestino Uriarte eta Monsinore Santos Iztueta Mendizabalen omenez.
Euskaraz idatzitako lehen liburuaren ingelesezko bertsioa aurkeztu dute aste honetan Bilbon
Bernard Etxepareren 'Linguae Vasconum Primitiae' (1545) liburuaren ingelesezko bertsioa elkarlanean argitaratu dute Reno-Nevadako Unibertsitateko 'Center for Basque Studies' (CBS) edo Euskal Ikasketa Zentruak eta Bizkaiko Foru Aldundiak. Aurkezpena Josune Ariztondo Bizkaiko Foru diputatuak eta CBSen Lagunen Elkarteko lehendakari Pello Salaburuk egin dute aste honetan Bilbon. Beñat Oyharcabal-en hitzaurrea eta Pello Salabururen aintzin-solasa dauka.
Misionesko Euskal Jatorri EEko Batzar Nagusiak Marta Sarasola berrautatu du elkarteko lehendakari
Argentina Iparraldeko Misiones Probintzian, bertako hiriburuko Euskal Jatorri Euskal Etxeak, Urteroko Ohiko Batzar Nagusia eginik, aurreko Zuzendaritza Batzordearen lana onartu eta berria hautatu du, lehendakari gisa konfidantza berriro emanez Marta Sarasolari. Sarasola buru, batzordekide izango dira baita ere Maria del Carmen Vizcaychipi, Horacio Ochoa, René Alberto Bergara, Gabriel Alzarria eta Maria Silvia Soloaga, besteak beste.
Eusko Jaurlaritza partaide Diasporaren Foro Globala egingo da gaur eta bihar Dublinen
Dublinen da Eusko Jaurlaritzaren Kanpoan den Euskal Komunitatearentzako zuzendaria, Asier Vallejo, Diasporaren Foro Globalean parte hartzeko. Gaur eta bihar egingo dira foroaren lan-saioak eta Vallejok zenbait lantegi eta elkarretaratzetan parte hartuko du. Foro hau AEBetan jaio bazen ere, mundura zabaldu da eta aurten Irlandak bilduko du Europako atala. Mintegia diasporako komunitateei zuzenduriko topagunea da eta diaspora eta sektore pribatu, erakunde publiko eta gizartearen artean harremanak sortzea du helburu.
Bazkideen sustapena eta Euskara Tailerra lehentasun Pilar-eko EEan, Angel Urriticoechea lehendakari
Buenos Aires probintzia argentinarrean, Pilar-eko Eusko Etxeak aurrera darrai 2013ko ekitaldiekin, apirilaren 11ean bere Zuzendaritza Batzordearen lehenengo bilera gauzatuta, buruzagien berrikuntza martxoaren 24ean egindako Batzar Nagusian egin ostean. Elkarteak lehentasun ezarri zituen, besteak beste, bazkideen sustapena eta Euskara Tailerraren zabalkundea. Angel Urriticoechea buru duen Zuzendaritza berrituan partaide dira baita ere Carlos Mossier Ugaldebere, Lidia Etchart, Fabiana Urriticoechea, Marta Balbiani eta Oscar Iribarren.
Zuzendaritza berritu du Bahia Blancako Union Vasca EEak, Mikel Irazusta lehendakari
Berez 'Union Vasca Sociedad de Socorros Mutuos' (Euskal Batasuna Elkarri Laguntzeko Elkartea) izen ofizialtzat duen Bahia Blancako Euskal Etxeak, erakundeko araudiaren araberako urteko batzarra eginik Zuzendaritza Batzordea berritu du, epe berrian Mikel Xabier Irazustak segituko duelarik lehendakari, lankide dituela, besteak beste, Javier Ederra, lehendakariorde; Maria Amelia Irastorza, idazkari; Juan Alberto Sosa, idazkariorde; Maria Teresa Sorrarain, diruzain; eta Iñaki Ederra, diruzainorde.
Guregandik, Jazoera, Mezulari eta Astero berri buletinen azken aleak heldu dira
EuskalKultura.com-en euskal etxeek euren jardueren berri emateko egiten dituzte ekimenak zabaltzen lagundu nahi dugu, batez ere albistariak eta buletin elektronikoak egiten dituztenen ahalegina azpimarratuz. Halatan, jarraian eskuragarri jarri ditugu geurera heldu diren lau buletin: Arturo Campion Euskal Ikasketa Zentruko Guregandik aldizkaria, Caracaseko Euskal Etxeko Jazoera, Necocheako Euskal Etxeko Mezulari eta Astero, North American Basque Organizations federazioaren asteroko buletina.
Paraguaiko Jasone Euskal Etxeak zuzendaritza berritu eta Eddy Irigoitia hautatu du presidenteorde
Iragan ostiralean, maiatzaren 3an, Asuncion hiriko Jasone Euskal Etxeak Ohiko Bilkura Orokorra egin zuen. Eguneko gai-zerrendak aldaketa garrantzitsu bat izan zuen azken orduan; izan ere, ordura arte presidenteorde zen Arturo Sasiainek kargua uzteko asmoa agertu zuen, osasun arazoak kari. Bere ordez Eddy Irigoitia bazkidea aukeratzea proposatu zuten bilerara bildu zirenek eta aho batez hautatu zuten buruzagi berria. Harekin batera zuzendaritzakide dira Hector Izaguirre presidente, Eddy Irigoitia presidenteorde eta Galo Egüez idazkari.
