"The Basque Diaspora Webscape": euskal etxeek sarean duten presentziari buruzko ikerketa

Renoko Center for Basque Studies euskal ikasketa guneak argitaratu berri du Pedro J. Oiarzabal Deustuko Unibertsitateko historialariaren "The Basque Diaspora Webscape" liburua. Lan honetan euskal Diasporak mundu digitalean, hau da, interneten, sortu duen irudia aztertzen du: euskal etxeen aurreneko orriak eta webguneak agertu zirenetik gaur eguneraino. "Internet etengabe aldatzen ari den mundua da eta ikerketa honetan Diaspora digitalaren sorrera eta garapena dokumentatu nahi izan ditut", adierazi dio egileak EuskalKultura.com-i.

Bilbao, Bizkaia. "The Basque Diaspora Webscape: Identity, Nation, and Homeland, 1990s-2010s" da Pedro J. Oiarzabal Deustuko Unibertsitateko historialariak argitaratu berri duen lanaren izenburua. Bertan, euskal etxeen bizitza digitala jasotzen du du ikerlariak: 90. hamarkadan sortu ziren aurreneko euskal elkarteen webguneetatik hasi eta gaurdaino.

Ikerketaren oinarrian Oiarzabalek 2006ean Renoko Unibertsitatean egin zuen tesia dago, baina gaur eguneraino zabaldura eta egungo ikuspegitik osatua.

Euskal Diaspora digitala

"Mundu digitala oso azkar aldatzen da eta lan honek euskal Diaspora digitalaren sorreraren historia jasotzen du", azaldu du Oiarzabalek. Ezbairik gabe etengabeko bilakaera bizi duen mundua da interneteko euskal diaspora, hango eta hemengo euskaldunen ekarpenekin hazten eta aldatzen dena.

Gure irakurleetako asko izango dira, akaso, historia horren protagonista: orain urte batzuk bere euskal etxearen webgunea sortzea erabaki zuen norbait, edo gaur egun Facebookeko taldeetan bere elkartearen hitzorduak eta argazkiak partekatzen dituena. Horiek guztien dira historia hau apurka apurka osatzen ari direnak, eta Oiarzabalek liburuan jaso nahi izan du gaur egun arte egin duten bidea, etorkizunean euskal Diaspora digitalaren sorrera nolakoa izan zen jakin nahi dutenentzako.

Ehun bat webgune

"Galkorra da internet, gauzak etengabe sortzen, aldatzen eta desagertzen dira, eta horren aurka borroka ari gara. Liburuarekin nik tarte historiko horretako argazki iraunkorra egin nahi izan dut, 90. hamarkadatik gaurdaino, hemendik urte batzuetara gaiari buruz jakin nahi dutenek datu horiek eskuragarri izan ditzaten", agertu du egileak.

Liburuak 16 herrialdetako 100 bat euskal etxeren webgune biltzen ditu, horien bitartez aztertzeko euskal elkarteen egoitza digital hauek "nola eta zertarako sortu ziren eta zer kontatzen duten".

Ikerketa eremu berria

Liburua ingelesez argitaratudu CBS-ek, baina Oiarzabalek azaldu duenez, gaiak Euskal Herrian interesa pizten badu, gaztelaniara eta euskarara ere itzultzea da bere helburua. Izan ere, egilearen esanetan, liburuaren hartzaileak, ikerlari eta historialariez gain, historiaren protagonistak dira; Diasporako euskaldunak, alegia.

"Horrez gain, beste edozein Diaspora txikirentzat ere interesgarria izan daitekeela uste dut, arlo honetan ikerketa eremu berria baita; ez dago sakontasun honekin egindako besterik", amaitu du Oiarzabalek.

Liburua erosteko jo Center for Basque Studies-en liburudenda digitalera.

Honatx liburuaren sarrerako pasarte bat, ingelesez:

"You ask me, “Where is Euskal Herria, the Basque Country?” Euskal Herria is everywhere. It is in the Australian sugar plantations of North Queensland, in the high desert of the western United States, in the pampas of Argentina, in the industrial and technological hubs of Europe and Asia, and in cyberspace, the last frontier expandedby our imaginations. Like a constellation of stars, the different Basque platforms on the World Wide Web (web) are connected by imaginary lines or links, drawing a picture that speaks of a new landscape that I call webscape. More than ever, Basque culture is uprooted, diasporic, and deterritorialized. It expands, bringing light to an expanding space. That is, the Basques—diaspora and homeland alike—are constructing an identity atlas: a sum of geographies, times, generations, and individual identities, by-products of lived experiences and inherited traditions."

euskalkultura.eus

Albisteak

"The Basque Diaspora Webscape": euskal etxeek sarean duten presentziari buruzko ikerketa

Komentarioak

Erlazionatutakoak

Irakurrienak

Azken komentarioak