euskalkultura.eus

Sao Paulo, Brasil. Sao Pauloko Unibertsitateak (USP) datorren abuztuaren 3an abiaraziko du Itapeviko Eusko-Brasildar Etxeak (Casa Basco Brasileira) sustatu duen euskara ikastaroa. Oinarrizko maila izango du eta helburua ikasleek gramatika eta elkarrizketa egitura oinarrizkoak eskuratzea izango da. Ikastaroa unibertsitateko ikasleei zein gaian interesa duen edonori irekia da eta gehienez 30 lagunek parte hartu ahal izango dute.

Ikastaroaren kudeaketa lanetan USPko Letren Fakultateko irakaslea den Maria Augusta da Costa Vieira ariko da. Ikastaroak ematearen ardura, baina, Oskar Goitiak izango du. Goitiak HABEk sustatzen duen euskal etxeetako euskara irakasleen trebakuntza programan parte hartu du, Euskara Munduan egitasmoaren barruan, azken urteetan. Programa honek sustatzen du ikastaro berri hau ere.

2008az geroztik Euskara Munduan egitasmoak antolatu dituen hainbat nazioarteko euskara barnetegietan ere ibili da Goitia, beti txapela buruan. Ez da esaera hutsa, euskal brasildar peto-peto honen ezaugarrietako bat beti buruan ibiltzen duen txapela da eta. Ikastaro hau erronka eta aurrera pauso handia da Goitia buru duen euskal etxearentzat; izan ere, USP Latinamerikako unibertsitaterik handiena da.

Ikasgaiak

Ikastaroak honako gaiak jorratuko ditu (euskara-portugesa): 

-1. Non dago Euskal Herria? (Onde esta o Pais Basco?) Non (onde); Izan aditza (verbo ser); caso nor (indicativo)

-2. Nor da? (Quem é?) Demostrativos, interrogativos; Ukan aditza (verbo tener); caso nork (ergativo)

-3. Hotelean (No hotel) Bizi izan (vivir, habitar); du eta ditu (tener singular e plural); nolakoa (como?)

-4. Nire Euskal Etxea (Minha Casa Basca) Morfemas: ba (afirmativo); ik (partitivo); agintera (imperativo). Erakusleak (demonstrativos)

-5. Turismo Bulegoan (No escritório de turismo) Asteko egunak (dias da semana); nahi eta behar aditzak (verbos querer e dever)

-6. Erosketak egiten (Fazendo compras) Zenbakiak (números); Balio aditza (verbo valer); opariak (alimentos)

-7. Arropa erosten (Comprando roupa) Koloreak (colores); arropak (roupas); zertarako (para que?)

-8. Etxekoekin hizketan (falando com a família) Familia (família); burutua (pretérito perfeito); Ezezkoak (negativas); aditzak (verbos)

-9. Hoteleko kafetegian (No café do hotel) Orduak (as horas); Zer da, zer naiz (que é, que eu sou?)

-10. Gozo-gozo afaltzen (Um jantar agradavel) Nora deklinabidea (a onde?); Nondik deklinabidea (de onde?); jatetxean (no restaurante); janari tipikoak (comidas típicas); bai, ez, galdera (afirmativo, negativo, interrogativo).

Matrikulazioa

Ikastaroak 16 ordu izango ditu orotara eta klaseak asteazkenetan izango dira, 14:00etatik 16:00tara. Gehienez 30 ikaslek eta gutxienez 5 lagunek egin ahal izango dute. Klaseak helbide honetan emango dituzte: Prédio de Letras, Av. Prof. Luciano Gualberto, 403.

Ikastaroa abuztuaren 3an hasi eta irailaren 28an bukatuko da. Parte hartu nahi dutenek matrikula egiteko epea uztailaren 26tik 29ra izango dute irekita. Matrikula egiteko bideak hauek dira: online (09:00tatik 16:30tara), zuzenean Idazkaritzan edo 3091-4645 telefonora deituz.