euskalkultura.eus

euskal diaspora eta kultura

Albisteak rss

Rosarioko Zazpirak Bat euskal etxea: atzeranzko kontua Mendeurreneko ospakizunekin hasteko

2012/06/14

2007ko Rosarioko Euskal Astea (argazkia EuskalKultura.com)
2007ko Rosarioko Euskal Astea (argazkia EuskalKultura.com)

PUBLIZITATEA

Joan den urte hasieran ekin zioten Rosarioko Zazpirak Bat euskal etxeko kideek erakundearen Mendeurrenaren ospakizuna antolatzeari. Lan eta ahaleginak fruituak ematen hasiak dira eta jai erraldoiaren egitaraua aski findua eta zehaztua dago. Ekitaldien garrantziak, ordea, gizatalde euskaldunaren mugak gainditu ditu eta bai Santa Fe probintziak bai Rosario hiriak Mendeurrena probintziaren eta udalaren interesekoa izendatu dute. Datozen hilabetetan hamaika ekintza burutuko dira Zazpirak Bat-eko lagunen eskutik, tartean Euskal Aste Nazionala; hona Mendeurrenaren egitaraua.

Rosario, Argentina. “Gure euskal etxe kuttunaren Mendeurrena ospatzeko burutuko ditugun aktibitateak ugariak eta mota askotakok dira. Esfortzu eta engaiamendu handia behar izan dugu den dena gauzatzeko, baina Zazpirak Bat-ek emandako guztia atzera eskertzeko xedearekin egiten dugu. Eta komunitate osoarekin partekatu nahi dugu”, hitz hauekin aurkezten zuen Mendeurreneko egitaraua Luis Maria Barrandeguy-k ‘Euskaldun hitza’ bere irratsaioan. Proposamenak gaur bertan hasiko dira, kasu honetan Bizkaiko hiriburuan, Bilbo Zaharra euskaltegiak antolatutako ‘Klasikoen ikarkuketa’n Zazpirak Bat-en partaidetzarekin.

Ondoren, hitzorduak jarraian zehaztu bezala iragarri dira:

Uztailaren 14an: Zazpirak Bat-en Mendeurrena, Ikurrinaren 118. urtemuga eta Gizataldeen Gaua. Gizataldeen Gaua Rosarioko Udalak sortutako ekimena da. Kolektibitate bakoitzak jai egun bat aukeratu behar zuen publiko orokorrari begira ekitaldi bat antolatzeko. Zazpirak Bat euskal etxekoek uztailaren 14a hautatu zuten aipatutako urtemugengatik. Uztailaren 14an Magdalena Mignabururen 'Gure Arropa' erakusketa, eta eskulanen salmenta gauzatuko da euskal etxeko lehenengo solairuan. Gaueko 9:30etan taberna antolatuko da egoitzako frontoian. Sarrerak 70 peso balio ditu (edariak ez daude prezio honen barne). Euskal etxetik gomendatzen dute txartelak aldez aurretik eskuratzea, erakundearen idazkaritzan.

Abuztuaren 4an: Zazpirak Bat-en eta I. San Inazioren Mendeurrena.

-09:30etan: FEVAren batzordearen bilera.
-15:30etan: Dantza taldeen bilera (Euskal Asteko dantzaldia antolatze aldera).
-19:30etan: Hildako kideen omenezko meza Maria Auxiliadora Elizan.
-21:30etan: Mendeurreneko Afaria. España kaleko Aretoan. Jaian bertako lehendabiziko San Inazio ospakizuna ere izango da gogoan. Rosarioko dantzariek eta Buenos Aireseko Accion Vasca taldeko dantzariek hartuko dute parte. Laurak Bat euskal etxeko agintariak ere bertaratuko dira. Sarrerei dagokienez, helduentzat: 200 peso; txikientzat (hamar urte arte dituztenentzat), 75 peso.

Txartelak bi kuotatan ordaindu ahal izango dira (ekainean eta uztailean). Ekainaren 19an jarriko dira salgai euskal etxearen ordezkaritzan. Koordinatzailea: Claudio Esnal.

Kultur Agenda:

Eta Zazpirak Bat euskal etxeko Kultur Azpibatzordetik, kultur agenda datorkigu:

Uztailaren 6an: 19:00etan, hitzaldia euskal etxearen egoitzan: ‘Euskal Nazionalismoa (1512-2012). Nafarroaren Konkista, antzinako Euskal Estatu independentea. Euskal kultura eta euskara. Kataluniako etxea partaide.

Uztailaren 19tik 29ra: euskal jatorrizko artista plastikoen erakusketak. 'Gure Arropa' erakusketa. Bernardino Rivadavia kultur guneko Olga Cossettini aretoan.

Uztailaren 19an: 18:00etan, Magdalena Mignaburu 'Gure Arropa' erakusketaren egilearen hitzaldia.

Abuztuaren 2an: 21:00etan, Santa Fe Probintziako Orkestra Sinfonikoaren kontzertua. Lekua: El Circulo antzokian.

Abuztuaren 4an: Mendeurreneko jaia.

Abuztuaren 25ean: Kolektibitate euskaldun, irlandar eta eskoziarren topaketa. Gaia: hizkuntzak. Hizlariak: Alejo Conti eta Fernando Lizarbe (euskara), Fernando O’Killian eta Guillermo Santana Mac Kinlay (gaelikoa). Euskal dantzak eta dantza irlandarrak. Zuzeneko musika Fingal taldearekin. Lekua: San Patricio elkarte katolikoan.

Urriaren 4, 11, 18 eta 25ean: euskal zineari buruzko zikloa. Hizlaria: Emilio Bellon. Lekua: El Cairo aretoan.

Urriaren 22an: ‘Pilpileando Argentina’ euskal elkartasun eta solidaritate ekimenaren aurkezpena Rosarion.

Urriaren 23an: ‘Euskaldunak eskualdean, 100 urte’ argazki erakusketaren inaugurazioa. Lekua: Antonio Berni gunean.

Euskal Aste Nazionala: 

Urriaren 26an:

-18:00etan: ‘Nortasuna eta ekonomia’ izenburupean Juan Jose Ibarretxe lehendakariaren hitzaldia. Lekua: Rosarioko Unibertsitatea.
-20:00etan: Gau artistikoa. Villa Mercedeseko euskal etxeko abesbatza eta Bizkaitik etorritako Itxartu Dantza Taldea. Lekua: El Circulo Antzokian.
-22:00etan: Erromeria.

Urriaren 27an:

-09:30etan: FEVAren bilera.
-18:00etan: kalejira.
-20:00etan: dantzaldia. Lekua: El Circulo antzokian.
-22:00etan: Erromeria.

Urriaren 28an:

-11:00etan: Meza, Villa Mercedeseko euskal etxeko abesbatza partaide.
-12:00etan: Dantzak plazan.
-14:00etan: Azken bazkaria. 

Euskal etxetik jakinarazten dute aldaketarik suertatzen bada adierazten joango direla. Bide batez, informazio gehiago jasotzeko, idazkaritzarekin kontaktuan jartzeko gomendatzen dute. Zazpirak Bat euskal etxeko idazkaritzaren ordutegia, hauxe: astearteetan 17:00etatik 22:00etara, asteazken, ostegun eta ostiraletan 17:00etatik 21:00etara; eta larunbatetan 17:00etatik 20:00etara. Telefono zenbakia: 0351 421 7670. Helbide elektronikoa: rosbazok@zazpirakbat.com.



Komentarioak

  • Zorionak!

    Zorionak Rosarioko euskaldunei. Guk elkartuko egongo gara jaialdia honetan! Besarkada bero bat. Oskar de Goitia Eusko Brasildar Etxea Lehendakaria

    Oskar de Goitia, 2012/06/15 02:55

« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia